काठमाडौं नेकपा एमालेका अध्यक्ष केपी शर्मा ओलीले आगामी दिनमा आफ्नो पार्टी पुनः सरकारको नेतृत्वमा पुग्ने दाबी गरेका छन्। काठमाडौंमा बुधबार सुरु भएको पार्टीको राष्ट्रिय भेलालाई सम्बोधन गर्दै उनले एमालेको राजनीतिक शक्ति जनताको समर्थन र संघर्षबाट स्थापित भएको बताएका हुन्।

‘फेरि नेकपा एमाले सरकारमा जान्छ, कान खोलेर सुने हुन्छ,’ ओलीले भने।

ADVERTISEMENT

उनले एमाले सरकारमा रहँदा कसैको कृपा वा आशीर्वादका कारण नभई जनताको विश्वास र राजनीतिक संघर्षका आधारमा पुगेको जिकिर गरे। पार्टीले अघि सारेका विकासका योजना र ‘समृद्ध नेपाल, सुखी नेपाली’को राष्ट्रिय आकांक्षालाई आगामी दिनमा पनि निरन्तरता दिने उनको भनाइ थियो।

ADVERTISEMENT

ओलीको यो अभिव्यक्तिले एमाले आगामी राजनीतिक प्रतिस्पर्धामा पुनः नेतृत्वदायी भूमिका हासिल गर्ने रणनीतिका साथ अघि बढ्न खोजेको संकेत गरेको छ।

स्थानीय निर्वाचन र संगठन परिचालनमा एमालेको जोड

एमालेले मंसिर २ र ३ गते आयोजना गरेको राष्ट्रिय भेलामा देशभरबाट करिब ३ हजार ४१४ प्रतिनिधि सहभागी भएको जनाएको छ।

भेलाको प्रमुख प्राथमिकतामा आगामी स्थानीय तह निर्वाचनको तयारी, पार्टी संगठनलाई सक्रिय बनाउने र केन्द्रीय कमिटीबाट भएका निर्णयलाई देशभरका पार्टी संरचनामार्फत प्रभावकारी रूपमा कार्यान्वयन गराउने विषय छन्।

भेलामा पार्टीले अघि सारेका १५ वटा कामका विषयमा छलफल गर्ने कार्यक्रम छ। महासचिव शंकर पोखरेलका अनुसार भेलाको उद्देश्य नयाँ नीतिगत निर्णय थप्नुभन्दा पनि यसअघि तय गरिएका नीति र कार्यक्रमलाई पार्टीका सबै तहमा समान ढंगले कार्यान्वयन गराउनु हो।

यसरी ओलीले सरकारको नेतृत्वमा पुनरागमन गर्ने राजनीतिक दाबी गरिरहँदा पार्टीको तत्कालीन प्राथमिकता भने संगठन सुदृढीकरण र स्थानीय निर्वाचनको तयारीमा केन्द्रित देखिएको छ। भेलाबाट हुने छलफल र निर्णयले एमालेको आगामी चुनावी रणनीति तथा संगठन परिचालनलाई कस्तो दिशा दिन्छ भन्ने चासोसमेत बढाएको छ।