२०८३ श्रावण १४, बिहीबार १७:४३
काठमाडौं । नेकपा (एमाले)का अध्यक्ष केपी शर्मा ओलीले सुनसरी र सिरहालगायतका क्षेत्रमा विकसित पछिल्लो घटनाक्रमप्रति गम्भीर चिन्ता व्यक्त गर्दै हिंसा अन्त्य गरी संवाद र सहमतिमार्फत समस्याको समाधान खोज्न अपिल गरेका छन्।
बिहीबार जारी अपिलमा ओलीले नागरिकलाई विभाजित गरेर अवाञ्छित उद्देश्य पूरा गर्ने षड्यन्त्रप्रति सचेत रहन आग्रह गर्दै कुनै पनि प्रकारको भ्रामक प्रचारको पछि नलाग्न र सामाजिक सद्भाव तथा राष्ट्रिय एकता कायम राख्न सबैलाई आह्वान गरेका छन्।
उनले सुनसरीको देवानगञ्ज गाउँपालिकामा उत्पन्न तनाव, राज्य पक्षबाट भएको बल प्रयोग तथा त्यस क्रममा ओमप्रकाश मेहता र सिरहाका गणेश यादवको गोली लागेर मृत्यु भएको घटनाप्रति दुःख व्यक्त गर्दै मृतकप्रति श्रद्धाञ्जली र शोकसन्तप्त परिवारप्रति समवेदना व्यक्त गरेका छन्। घाइतेहरूको शीघ्र स्वास्थ्यलाभको कामनासमेत गरेका छन्।
ओलीले नागरिकको जीउधनको सुरक्षा गर्दै संवादमार्फत समस्याको समाधान गर्नु सरकारको पहिलो दायित्व भएको उल्लेख गर्दै वर्तमान परिस्थितिमा सरकारले देखाएको उदासीनता, अत्यधिक बल प्रयोग र मौनता भर्त्सनायोग्य रहेको बताएका छन्। उनले हिंसात्मक गतिविधि तत्काल रोक्न र वार्ताको माध्यमबाट निकास खोज्न सरकारसँग आग्रह गरेका छन्।
उनले मुलुक विषम परिस्थितिबाट गुज्रिरहेको अवस्थामा प्रमुख राजनीतिक दलहरूले आरोप–प्रत्यारोप र सस्तो लोकप्रियताभन्दा माथि उठेर शान्ति, सुरक्षा र स्थायित्वका लागि सहकार्य गर्नुपर्नेमा जोड दिएका छन्।
ओलीले द्वन्द्व र हिंसाबाट समस्याको समाधान सम्भव नभएको उल्लेख गर्दै राष्ट्रिय हित, सामाजिक सद्भाव र शान्ति स्थापनाका लागि सम्पूर्ण राजनीतिक दल, नागरिक समाज, बुद्धिजीवी तथा धार्मिक र सामाजिक समुदायका अगुवालाई एकजुट हुन आह्वान गरेका छन्।
यस्तो छ ओलीको अपीलः
सुनसरी जिल्लाको देवानगञ्ज गाउँपालिकामा विगत केही दिनदेखि उत्पन्न तनावग्रस्त परिस्थिति, राज्य पक्षबाट भएको बल प्रयोग तथा त्यस क्रममा स्थानीय युवा ओमप्रकाश मेहता, आज सिरहाका गणेश यादवको गोली लागेर भएको दुःखद निधन र अन्य नागरिकहरू गम्भीर घाइते भएको घटनाप्रति हाम्रो पार्टी नेपाल कम्युनिष्ट पार्टी (एमाले) को गम्भीर ध्यानाकर्षण भएको छ ।
अमानवीय क्रम रोकिनुको सट्टा झन् उग्र बन्दै आज सिरहा लगायतका विभिन्न स्थानहरूमा समेत गोली लागी थप नागरिकहरूको ज्यान गएको खबरले हामीलाई अत्यन्त स्तब्ध र मर्माहत बनाएको छ । यस हिंसामा ज्यान गुमाउनुभएकाहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछु । साथै, घाइते नागरिकहरूको शीघ्र स्वास्थ्यलाभको कामना गर्दछु ।
यस जटिल र संवेदनशील घडीमा सम्पूर्ण नागरिक, राजनीतिक दल तथा सरोकारवालाहरूसँग म निम्नअनुसार अपिल गर्दछुः
१. संयमता र सामाजिक सद्भावः
नागरिकहरूबीचको एकता र भ्रातृत्व नै राष्ट्रको बल हो । जनतालाई आपसमा विभाजित गर्दै अवाञ्छित उद्देश्य पूरा गर्ने षड्यन्त्रहरू भइरहेको हुन सक्नेतर्फ सचेत हुँदै नेकपा (एमाले) र अन्य राजनीतिक पार्टीका नेता–कार्यकर्ता, नागरिक समाज र सञ्चारकर्मी लगायत सम्पूर्ण आम नागरिकहरूलाई कुनै पनि प्रकारको भ्रामक प्रचारको पछि नलागी संयमित हुन, सामाजिक सद्भाव र एकता कायम राख्नकालागि सक्रिय हुन हार्दिक अनुरोध गर्दछु ।
२. सरकारको गैरजिम्मेवार भूमिका र मौनताः
नागरिकको जीउधनको रक्षा गर्नु र संवादको माध्यमबाट समस्याको समाधान गरी देशलाई शान्तिको बाटोमा लैजानु सरकारको प्राथमिक दायित्व हो । तर, राष्ट्रिय सुरक्षा र सामाजिक सुव्यवस्था संवेदनशील अवस्थामा पुग्दा समेत सरकारले देखाएको उदासीनता, अत्यधिक बल प्रयोग र मौनता अत्यन्त शंकास्पद एवं भत्र्सनायोग्य छ । हिंसात्मक कदम तत्काल रोकी अविलम्ब संवादको माध्यमबाट समाधान खोज्न आग्रह गर्दछु ।
३. दलहरूबीच राजनीतिक सहकार्यः
मुलुक विषम परिस्थितिबाट गुज्रिरहेको बेला मुख्य राजनीतिक दलहरूले आपसी राजनीतिक प्रतिस्पर्धा, आरोप–प्रत्यारोप र सस्तो लोकप्रियताभन्दा माथि उठेर मुलुकमा शान्ति, सुरक्षा र स्थायित्व कायम गर्न सहकार्य गर्नु आवश्यक छ ।
४. राष्ट्रिय एकता र शान्तिका लागि आह्वानः
द्वन्द्व र हिंसाबाट समस्याको समाधान हुन सक्दैन । संवाद, सहमति र जिम्मेवार सहकार्यले नै वर्तमान जटिलताबाट मुलुकलाई निकास दिने छ ।
राष्ट्रको अस्तित्व, शान्ति–सुरक्षा र सामाजिक सद्भावमाथि संकट आउन लागेको यस घडीमा म सम्पूर्ण राजनीतिक दल, नागरिक समाज, बुद्धिजीवी तथा विभिन्न धार्मिक एवं सामाजिक सम्प्रदायका अगुवाहरूलाई राष्ट्रिय हित र शान्ति स्थापनाका लागि एकजुट हुन हार्दिक आह्वान गर्दछु ।
