२०८३ कार्तिक १३, शुक्रवार ०८:४१
काठमाडौं । भुटानमा गएराति एक्कासि ठूलो बाढी आएपछि हिमताल विस्फोट भएको आशंका गरिएको छ। बाढीका कारण गासा र पुनाखा जिल्लाका विभिन्न क्षेत्रमा क्षति पुगेको छ भने जोखिमयुक्त क्षेत्रका स्थानीय बासिन्दा, कर्मचारी तथा सुरक्षाकर्मीलाई सुरक्षित स्थानमा सारिएको छ।
भुटान ब्रोडकास्टिङ सर्भिस (बीबीएस)का अनुसार गासा जिल्लाको छाचु क्षेत्र बाढीले प्रभावित भएको छ। मो छू नदीमा आएको बाढीले पुनाखा जिल्लास्थित सौर्य सिँचाइ प्रणालीमा समेत क्षति पुर्याएको छ।
बाढीसँगै आएको ढुंगा, माटो र गेग्रानले जोमलिङथाङ क्षेत्रमा पुनाखा–गासा राजमार्गको एक खण्ड बगाएको छ। त्यस्तै, लाया गेओगको सडकअन्तर्गत टोङचुद्राक खण्डमा पनि क्षति पुगेको छ। सडक अवरुद्ध भएपछि लाया क्षेत्र अन्य भागसँगको सडक सम्पर्कबाट विच्छेद भएको बीबीएसले जनाएको छ।
बाढीबाट मानवीय क्षति भएको विवरण भने अहिलेसम्म प्राप्त भएको छैन। रातिको समयमा बाढी आएकाले तत्काल क्षतिको पूर्ण विवरण संकलन गर्न कठिन भएको अधिकारीहरूले बताएका छन्।
सिन्ताफु हिमताल विस्फोटको आशंका
गासा जिल्लास्थित सिन्ताफु हिमताल विस्फोट भएर बाढी आएको हुन सक्ने आशंका गरिएको छ। भुटानको लाया गेओगस्थित लुंगो क्षेत्रमा वाकिला हिमालको फेदीमा रहेको यो हिमताल देशका १७ सम्भावित जोखिमयुक्त हिमतालमध्ये एक हो।
सिन्ताफु हिमताल मो छू नदीको मुहान क्षेत्रमा पर्ने भएकाले नदीमा आएको आकस्मिक बाढीसँग यसको सम्बन्ध हुन सक्ने अनुमान गरिएको हो। सामाजिक सञ्जालमा सार्वजनिक भएका केही तस्बिरमा हिमतालबाट पानी बाहिरिएको जस्तो देखिए पनि ती तस्बिरको आधिकारिकता पुष्टि हुन बाँकी छ।
जोखिम क्षेत्रका बासिन्दा सुरक्षित स्थानमा सारिए
बाढीको जोखिमलाई ध्यानमा राख्दै प्रभावित क्षेत्रका सैनिक, कर्मचारी र स्थानीय बासिन्दालाई सुरक्षित स्थानमा जान निर्देशन दिइएको छ। ताक्त्सिमाखाङमा खटिएका सैनिक, परियोजना कार्यालयका कर्मचारी तथा गासा छाचु क्षेत्रमा रहेका व्यक्तिलाई सुरक्षित स्थानमा सारिएको छ।
गासा छाचुको तातोपानी कुण्डमा रहेका कर्मचारी र आगन्तुकलाई पनि सुरक्षित स्थानमा पुर्याइएको छ। पुनाखाको येबिसा क्षेत्रमा समेत बाढीको पानी पुगेपछि पुनाखा सेन्ट्रल स्कुलले आफ्ना सबै आवासीय विद्यार्थीलाई सुरक्षित रूपमा अग्लो स्थानमा सारेको जनाएको छ।
नदीको जलस्तर निगरानी, साइरन सक्रिय
भुटानको राष्ट्रिय जलविज्ञान तथा मौसम विज्ञान केन्द्रले मो छू नदीको तासिथाङ र येबेसा क्षेत्रमा पानीको सतह निरन्तर निगरानी गरिरहेको जनाएको छ। मो छू र पुनात्साङछु नदीको तल्लो तटीय क्षेत्रमा जडान गरिएका साइरन प्रणालीसमेत सक्रिय पारिएको छ।
सम्भावित जोखिमलाई ध्यानमा राख्दै आसपासका जिल्लालाई पनि सतर्क गराइएको छ। बाढीसँगै ढुंगा, माटो तथा अन्य गेग्रान बगेर आउन सक्ने जोखिमका कारण पुनात्साङछु–२ जलविद्युत् आयोजनाले विद्युत् उत्पादन गर्ने युनिट बन्द गरेको छ।
आयोजनाले बाँधका ढोका खोलेर जलाशयको पानीको सतह घटाएको छ। बाढीको पानी र त्यससँगै आउने गेग्रानलाई सहज रूपमा निकास दिन यस्तो सावधानी अपनाइएको हो।
हिमताल वास्तवमै विस्फोट भएको हो वा अन्य कारणले बाढी आएको हो भन्नेबारे आधिकारिक पुष्टि हुन बाँकी छ। बाढीको परिमाण र त्यसबाट भएको क्षतिको विस्तृत विवरणसमेत सार्वजनिक हुन सकेको छैन।
