२०८३ भाद्र २७, शनिवार १४:५४
काठमाडौँ । विज्ञान, प्रविधि तथा नवप्रवर्तन मन्त्री महावीर पुनले संयुक्त अरब इमिरेट्स (युएई) मा अलपत्र परेका एक नेपालीको उद्धारका लागि आग्रह गरेका छन् । शनिबार आफ्नो फेसबुकमार्फत मन्त्री पुनले ती नेपालीको उद्धार गर्न सम्बन्धित पक्षसँग आग्रह गरेका हुन् ।
मन्त्री पुनले सुनिल लुंगेली मगर नाम गरेका नेपालीले आफूलाई दुबईबाट रुँदै फोन गरेको बताउँदै कसैले उनको उद्धार गरिदिन सक्नुहुन्छ ? भन्दै स्ट्याटस लेखेका छन् ।
यद्यपि, मन्त्री पुनले उद्धार गर्न आग्रह गर्दा उनको सामाजिक सञ्जालमा आलोचना भइरहेको छ । कार्यस्थलमा रोजगारदाता कम्पनीले लुंगेली मगरको राहदानी खोसेर राखिदिएपछि उनी अलपत्र परेको मन्त्री पुनले बताएका छन् ।
महावीर आफैँ मन्त्री भएका कारण परराष्ट्र मन्त्रालय वा श्रम मन्त्रालयमार्फत ती नेपालीलाई उद्धार गर्न सकिन्थ्यो तर उनले सरकारी निकायबाट पहल नगरी सिँधै आफ्ने फेसबुकमा उद्धारको आह्वानसहित पहल गर्न आग्रह गरेका छन् ।
मन्त्री पुनले मगरसँग राहदानीबाहेक अन्य कागजातहरू पनि सुरक्षित रहेको बताउँदै शारजहाँ वा दुबई क्षेत्रमा रहेका नेपाली समुदाय तथा सङ्घ–संस्थालाई ती युवाको सम्पर्कमा पुगेर यथाशीघ्र उद्धार गर्न उनले आग्रह गरेका छन् ।
उनको फेसबुकमा एक पाठकले कमेन्टस् गर्दै भनेका छन्– ‘उद्धारका लागि नागरिकले सरकारलाई गुहारेको छ, तर सरकारले फेरि उद्धार गर्न नागरिक नै खोज्नुपर्ने अवस्था हो भने सरकारको भूमिका आखिर के हो ?’
अर्का एक जनाले लेखेका छन्– ‘सरकारको मन्त्रीले नेपालीलाई उद्धार गर्न सहयोग माग्छन्, कति लाजमर्दो भयो तैट कूटनीतिक पहल भने पनि त हुन्छ होला नि ? के दुबई सरकारले लोप्पा खुवाइ दियो हाम्रो वैज्ञानिक मन्त्रीलाई ।’
