२०८३ श्रावण १८, सोमबार १६:२९
काठमाडौं । पोर्चुगिज फुटबल खेलाडी क्रिस्टियानो रोनाल्डो र जर्जिना रोड्रिगेजको बहुप्रतिक्षित विवाह अन्तत: नजिकिँदै गरेको देखिन्छ ।
विभिन्न समाचारहरूका अनुसार यो जोडीले पोर्चुगलको मदेइरा टापुमा विवाह गर्ने योजना बनाइरहेका छन् । जहाँ रोनाल्डा जन्मे हुर्के बढेका थिए ।
यद्यपि रोनाल्डो वा जर्जिना कसैले पनि विवाहको मिति वा स्थानबारे आधिकारिक रूपमा पुष्टि गरेका छैनन्, तर बेलायती सञ्चारमाध्यमहरूका अनुसार यो समारोह ८ अगस्टमा हुने अनुमान गरिएको छ।
द सनका अनुसार यो जोडीले मदेइराको राजधानीस्थित ऐतिहासिक फन्चल क्याथेड्रलमा विवाह गर्नेछन र त्यसपछि पाँच तारे होटद साभोय प्यालेस होटलमा भव्य भोजको आयोजना गर्नेछन्।
विलासी होटलका पाहुनाहरूलाई एउटा निजी कार्यक्रमका कारण शुक्रबार र शनिबार होटलका दुई तला तथा केही बार क्षेत्रहरू बन्द रहने जानकारी गराइएपछि यसबारेका चर्चा परिचर्चाले थप गति लिएको छ।
रोनाल्डोका लागि मदेइराको विशेष महत्त्व छ। फुन्चलमा जन्मिएर हुर्केका पोर्चुगलका कप्तानले यसै टापुबाट आफ्नो फुटबल यात्रा सुरु गरेका थिए र पछि गएर खेलको इतिहासमै सर्वोत्कृष्ट खेलाडीहरूमध्ये एक बन्न सफल भए। विवाह समारोहका लागि आफ्नो गृहनगर रोज्नु उनको व्यक्तिगत जीवनमा एउटा प्रतीकात्मक र अर्थपूर्ण क्षण हुनेछ।
पोर्चुगिज सञ्चारमाध्यमहरूले यसअघि नै जनाएअनुसार रोनाल्डो र जर्जिना सन् २०२६ को फिफा विश्वकपपछि मदेइरामा विवाह गर्ने योजनामा छन् । यसका लागि फन्चल क्याथेड्रललाई विवाह स्थलका रूपमा र सोही टापुको कुनै एक विलासी होटललाई उत्सव आयोजना गर्ने स्थानका रूपमा हेरिएको छ।
सन् २०१६ मा पहिलो पटक भेट भएका रोनाल्डो र जर्जिनाको सम्बन्ध छिट्टै नै फुटबल जगतको सबैभन्दा चर्चित प्रेम सम्बन्धमध्ये एक बन्न पुग्यो। अगस्ट २०२५ मा जर्जिनाले ठूलो हिराको औंठी लगाएको तस्बिर सार्वजनिक गर्दै आफ्नो इन्गेजमेन्टको पुष्टि गरेकी थिइन् भने पछि रोनाल्डोले विवाहको प्रस्ताव राख्ने निर्णयमा आफ्ना छोरीहरूको पनि भूमिका रहेको खुलासा गरेका थिए। यो जोडीले सँगै पाँच सन्तानको हेरचाह गरिरहेको छ।
