२०८३ असार ३२, बिहीबार ०७:३५
काठमाडौँ । अर्जेन्टिनालाई लगातार दोस्रो पटक फिफा विश्वकपको फाइनलमा पुर्याएका कप्तान लियोनल मेसी ‘गोल्डेन बुट’को दौडमा शीर्ष स्थानमा उक्लिएका छन्।
इंग्ल्यान्डविरुद्धको सेमिफाइनलमा दुई असिस्ट गर्दै टोलीलाई जित दिलाएका मेसीले व्यक्तिगत अवार्डको प्रतिस्पर्धामा पनि फ्रान्सका कप्तान किलियन एम्बाप्पेलाई पछि पारेका हुन्।
रोमाञ्चक सेमिफाइनलमा मेसीको उत्कृष्ट प्रदर्शनसँगै अर्जेन्टिनाले इंग्ल्यान्डलाई पराजित गर्दै फाइनल यात्रा तय गरेको हो। साविक विश्वविजेता अर्जेन्टिनाले अब उपाधिका लागि स्पेनसँग प्रतिस्पर्धा गर्नेछ।
जारी प्रतियोगितामा मेसीले हालसम्म ८ गोल र ४ असिस्ट गरेका छन्। समान ८ गोल गरेका एम्बाप्पेको असिस्ट भने ३ मात्रै रहेकाले मेसी ‘गोल्डेन बुट’को दौडमा अगाडि छन्।
विश्वकप इतिहासमा सर्वाधिक ३३ खेल खेलिसकेका मेसीले हालसम्म २१ गोल र ११ असिस्टको कीर्तिमानी योगदान दिएका छन्। यता २६ वर्षीय एम्बाप्पेले विश्वकपमा २० गोल पूरा गरिसकेका छन्।
अब फ्रान्सले तेस्रो स्थानका लागि शनिबार इंग्ल्यान्डसँग खेल्नेछ भने अर्जेन्टिनाले सोमबार हुने फाइनलमा स्पेनको चुनौती सामना गर्नेछ।
‘गोल्डेन बुट’ विश्वकपमा सर्वाधिक गोल गर्ने खेलाडीलाई प्रदान गरिने प्रतिष्ठित व्यक्तिगत अवार्ड हो। गोल संख्या बराबर भए असिस्ट र त्यसपछि कम खेल समयलाई आधार मानेर विजेता निर्धारण गरिन्छ।
सन् २०२२ को विश्वकपमा भने एम्बाप्पेले ‘गोल्डेन बुट’ जितेका थिए।
