२०८२ आश्विन १४, मंगलवार ११:१६
टीकापुर। दसैँको चाड घरपरिवार र आँगनमा रमाइलो ल्याउने समयमा पनि महिलाहरूको कामको बोझ झन् बढिरहेको छ। घर फर्केका वा रोजगारीका लागि बाहिर रहेका सदस्यहरू मिल्दा घरमा रौनक हुन्छ, तर खाना, सरसफाइ र पाहुनाको स्वागत जस्ता घरायसी काम महिला मुख्यत: भोग्न बाध्य हुन्छन्।
भजनी नगरपालिका–की साधना साउदका अनुसार, विदेशमा रहेका श्रीमान् फर्किएपछि घरमा रौनक छ, तर बिहान ४ बजेदेखि राति ११ बजेसम्मको कामले उनलाई थकित बनाएको छ। “सबै रमाउनेमा छन्, तर काम जति मेरो जिम्मामा छ,” उनले भनिन्।
टीकापुरकी द्रोपती तिमिल्सिनाले दसैँ, तिहारमा पुरुष फुर्सदिला देखिने, महिला भने घरायसी काममा व्यस्त हुने देखिन्छन्। “महिलाले नयाँ ठाउँ घुम्ने, अध्ययन गर्ने वा आफ्ना लागि समय पाउने अवसर पाउँदैनन्,” उनले गुनासो गरिन्।
जानकी कुँवरले भने, कामकाजी महिलालाई चाडपर्वमा दोहोरो जिम्मेवारी हुने भएकाले सहयोग आवश्यक रहेको बताइन्। “परिवारका सदस्यले मिलेर काम गर्नुपर्छ, अनि चाडपर्व सबैका लागि रमाइलो हुनुपर्छ,” उनले सुझाइन्।
अधिकारकर्मी चन्द्रावती शर्माले पुरुषहरूको जुवातास, रमाइलो र खानपानमा व्यस्तता पारिवारिक कलह र हिंसा बढाउने चेतावनी दिइन्। “महिला रातदिन काममा व्यस्त हुँदा परिवारमा अशान्ति हुनसक्छ। सबै मिलेर काम बाँडफाँड गर्ने र चाडपर्व मनाउनुपर्छ,” उनले भनिन्।
महिला अधिकारकर्मी कौशल्या खनालका अनुसार, पितृसत्तात्मक समाज र सन्तानलाई बराबरी काम सिकाउनु नपरेकाले महिलाले अझ हिंसा भोग्नुपरेको छ। “छोरालाई सानैदेखि घरायसी काम सिकाउनुपर्छ, जसले भविष्यमा समानता सुनिश्चित गर्छ,” उनले भनिन्।
स्वास्थ्यकर्मी हेमा ज्ञवालीले पनि महिलालाई चाडपर्वमा आफ्नो स्वास्थ्यको ख्याल राख्न र तनाव कम गर्न योग, ध्यान वा अन्य व्यायाम गर्न सुझाइन्। “सबै मिलेर काम बाँडफाँड गर्ने, खर्च सल्लाहमा गर्ने र रमाइलो गर्ने हो भने परिवार र समाजमा शान्ति फैलिन्छ,” उनले जोड दिइन्।
