२०८३ श्रावण ३, आईतवार १२:४०
काठमाडौं । पूर्वप्रधानमन्त्री तथा नेकपा नेता झलनाथ खनालले प्रदेशमा कांग्रेससँग नभई कम्युनिस्टकै सरकार बनाउनुपर्ने धारणा सार्वजनिक गरेका छन् । आइतबार विज्ञप्तिमार्फतले उनले नयाँ राजनीतिक समीकरण बनाउनुभन्दा पहिले विस्तृत छलफल गर्ने आवश्यक रहेको बताए ।
प्रदेशहरूमा सत्ता गठबन्धन गर्ने चर्चा चलेपछि नेकपाका नेता खनालले अपवित्र साँठगाँठतिर नलाग्न पार्टी नेतृत्वलाई चेतावनीसमेत दिएका छन् ।
‘यो जटिल अवस्थामा नेपाली कम्युनिस्ट पार्टीले कुनै पनि नयाँ राजनीतिक समीकरणबारे सोच्नुभन्दा अगाडि कम्तीमा केन्द्रीय संयोजन समितिको बैठक बोलाइयोस्, आजको आवश्यकताका बारेमा कमिटीमा विस्तृत रूपले छलफल गरियोस् र क्रान्तिकारी उद्देश्य र वर्ग दृष्टिकोणलाई सर्वोपरी राखेर मात्र प्रदेशसभामा सरकार बनाउने सम्बन्धमा नीति निर्णय गरियोस् र पार्टीलाई दक्षिणपन्थी वर्ग सम्झौतावादको दलदलतिर जानबाट संस्थागत रूपले बचाइयोस्’, खनालले भनेका छन्, ‘केही नेताहरूको कुर्सी मोह र आत्म तृप्तिका निम्ति मात्र साँठगाँठ गर्ने प्रवृत्तिलाई रोकियोस् र आम जनतालाई क्रान्तिकारी परिवर्तनको दिशामा अघि बढाइयोस्। हामी नेपालका सबै कम्युनिस्ट र वामपन्थीहरूले बुझ्नुपर्छ(यो साँठगाँठको बेला होइन, सही कार्यदिशाका आधारमा पार्टीलाई पुनर्गठन र रूपान्तरण गर्ने बेला हो ।’
खनालले बालेन्द्र शाहको नेतृत्वमा नयाँ सरकार बनेपछि मुलुकका ज्वलन्त समस्याहरु समाधानको दिशातिर जान्छन् कि भन्ने आमजनताको आशाविपरीत मुलुकको राष्ट्रियता, राष्ट्रिय स्वतन्त्रता, जनताका जनजीविका, जनताका हित र अधिकारहरु, जनताको सुचना प्राप्त गर्ने हकहरु, छिमेकी मुलुकहरु संगका सम्बन्धहरु र राज्यकै विभिन्न अंगहरु बीचका सम्बन्धहरुसमेत खलबलिन थालेको दाबी गरेका छन् ।
‘यो देशका श्रमजीवी जनता खोलामा हामफाल्न र आत्महत्या गर्न वाध्य हुन थालेका छन्। यस्तो जटिल परिस्थितिमा बढ्दो विदेशी हस्तक्षेप र बढ्दो घरेलु अस्तव्यस्ताका विरुद्ध यो देशका आमजनता, तमाम देशभक्त, लोकतान्त्रिक, वामपन्थी, समाजवादी र प्रगतिशील शक्तिहरु एकतावद्ध भएको देख्न चाहन्छन्। यस्तो एकतालाई सम्पुर्ण वाममंथीहरुको एकतावद्ध पहलबाट भएको हेर्न चाहन्छन्,’ उनले भनेका छन् ।
सुदूरपश्चिम प्रदेशबाट सुरु भएको सत्ताको किचलो कर्णाली, बागमती हुँदै लुम्बिनीसम्म पुगेको छ । गण्डकी र कोशी प्रदेशमा पनि कसको नेतृत्वमा सरकार बन्छ भन्ने एकिन छैन । मधेश प्रदेशमा भने कांग्रेस नेतृत्वकै सरकार कायम रहने एमाले र नेकपाले समझदारी गरेका छन् ।
