२०८३ कार्तिक १५, आइतवार १३:०८
काठमाडौं । सिद्धार्थ बैंकले चालु आर्थिक वर्ष २०८३/८४ को पहिलो त्रैमासमा उल्लेख्य वित्तीय प्रगति गरेको छ । बैंकले सार्वजनिक गरेको अपरिष्कृत वित्तीय विवरणअनुसार समीक्षा अवधिमा ८५ करोड १५ लाख ६५ हजार रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा १६२.७५ प्रतिशतले बढी हो । गत वर्षको पहिलो त्रैमासमा बैंकले ३२ करोड ४० लाख ९१ हजार रुपैयाँ खुद नाफा कमाएको थियो ।
बैंकको नाफा वृद्धिमा खुद ब्याज आम्दानीमा भएको विस्तार र कर्जा नोक्सानी व्यवस्थाबापत छुट्याइएको रकममा आएको कमीले योगदान गरेको छ । समीक्षा अवधिमा बैंकको खुद ब्याज आम्दानी १०.५० प्रतिशतले बढेर २ अर्ब ३८ करोड ९६ लाख ९३ हजार रुपैयाँ पुगेको छ ।
यस अवधिमा बैंकले ५ अर्ब ३६ करोड ४९ लाख रुपैयाँ कुल ब्याज आम्दानी गरेको छ भने ब्याज खर्च २ अर्ब ९७ करोड ५२ लाख रुपैयाँ रहेको छ । त्यस्तै, खुद शुल्क तथा कमिसन आम्दानी १०.९४ प्रतिशतले बढेर ५७ करोड ७ लाख ९ हजार रुपैयाँ पुगेको छ । बैंकको कुल सञ्चालन आम्दानी ३ अर्ब २५ करोड ५ लाख २७ हजार रुपैयाँ कायम भएको छ ।
इम्पेयरमेन्ट चार्जमा ५१ प्रतिशतको कमी
बैंकको नाफा वृद्धिमा कर्जा नोक्सानी व्यवस्थाबापत छुट्याइएको रकम घट्नुले महत्वपूर्ण भूमिका खेलेको छ । गत आर्थिक वर्षको पहिलो त्रैमासमा १ अर्ब ३८ करोड ८७ लाख ६६ हजार रुपैयाँ रहेको इम्पेयरमेन्ट चार्ज चालु आवको सोही अवधिमा ५१.४७ प्रतिशतले घटेर ६७ करोड ३९ लाख २५ हजार रुपैयाँमा झरेको छ ।
यससँगै बैंकको करअघिको नाफा १ अर्ब २३ करोड ८८ लाख २१ हजार रुपैयाँ पुगेको छ । बैंकले यस अवधिमा ३८ करोड ७२ लाख ५५ हजार रुपैयाँ चालु कर व्यवस्था गरेको छ ।
निक्षेप र कर्जा दुवैमा वृद्धि
बैंकको निक्षेप संकलन र कर्जा प्रवाहमा पनि वृद्धि भएको छ । गत असार मसान्तको तुलनामा पहिलो तीन महिनामा ग्राहक निक्षेप २.५७ प्रतिशतले बढेर ३ खर्ब ३४ अर्ब ८० करोड १२ लाख रुपैयाँ पुगेको छ । गत असार मसान्तमा यस्तो निक्षेप ३ खर्ब २६ अर्ब ४० करोड रुपैयाँ थियो ।
त्यस्तै, बैंकको कर्जा प्रवाह ४.२५ प्रतिशतले वृद्धि भई २ खर्ब ४४ अर्ब ४ करोड ७ लाख रुपैयाँ पुगेको छ । यसले बैंकको व्यवसाय विस्तारलाई निरन्तरता दिएको देखाउँछ ।
वितरणयोग्य मुनाफा ३९ करोड रुपैयाँभन्दा बढी
सिद्धार्थ बैंकको वित्तीय विवरणमा सेयरधनीका लागि वितरणयोग्य मुनाफा पनि उल्लेखनीय देखिएको छ । चालु आर्थिक वर्षको पहिलो त्रैमासको खुद वितरणयोग्य नाफा २७ करोड ७९ लाख ८४ हजार रुपैयाँ रहेको छ ।
गत वर्षको सञ्चित नाफाबाट नगद लाभांश भुक्तानी गरेपछि बाँकी रहेको रकमसमेत जोड्दा असोज मसान्तसम्म बैंकको सञ्चित वितरणयोग्य मुनाफा ३९ करोड ६ लाख ३९ हजार रुपैयाँ पुगेको छ ।
बैंकले ऋणपत्र परिपक्व भएपछि त्यसबापत राखिएको क्यापिटल रिडेम्पसन रिजर्भलाई क्यापिटल एडजस्टमेन्ट रिजर्भमा सारेको छ । बैंक सञ्चालक समितिको निर्णयअनुसार उक्त रिजर्भमा रहेको रकमसहित कुल ३ अर्ब ५७ करोड ३७ लाख ५० हजार रुपैयाँ बराबरको वितरणयोग्य कोष बोनस सेयर जारी गर्नका लागि मात्र उपयोग गरिनेछ ।
यस व्यवस्थासहित गणना गर्दा बैंकको वितरणयोग्य प्रतिसेयर आम्दानी २५.६३ प्रतिशत पुगेको छ । नियमित वार्षिकीकरण गरिएको वितरणयोग्य प्रतिसेयर आम्दानी भने ६.०७ प्रतिशत रहेको छ ।
ईपीएस बढेर १८ रुपैयाँ ७६ पैसा
नाफामा भएको वृद्धिसँगै बैंकको वार्षिकीकरण प्रतिसेयर आम्दानी (ईपीएस) ७ रुपैयाँ ८२ पैसाबाट बढेर १८ रुपैयाँ ७६ पैसा पुगेको छ । बैंकको प्रतिसेयर नेटवर्थ १९९ रुपैयाँ ६१ पैसा र प्रतिसेयर कुल सम्पत्तिको मूल्य २ हजार ३७८ रुपैयाँ ८४ पैसा रहेको छ ।
बैंकको इक्विटीमा प्रतिफल ४.१२ प्रतिशतबाट बढेर ९.२८ प्रतिशत पुगेको छ भने सम्पत्तिमा प्रतिफल ०.३८ प्रतिशतबाट बढेर ०.७९ प्रतिशत कायम भएको छ । असोज मसान्तमा बैंकको मूल्य आम्दानी अनुपात २२.९४ गुणा र तरलता अनुपात ३१.९३ प्रतिशत रहेको छ ।
खराब कर्जा घट्यो, आधार दरमा सुधार
बैंकको कर्जाको गुणस्तरमा पनि सुधार देखिएको छ । गत वर्षको पहिलो त्रैमासमा ३.८० प्रतिशत रहेको निष्क्रिय कर्जा अनुपात चालु आवको सोही अवधिमा घटेर ३.७० प्रतिशतमा झरेको छ । खुद निष्क्रिय कर्जा अनुपात पनि १.३३ प्रतिशतबाट घटेर १.०८ प्रतिशत कायम भएको छ ।
निष्क्रिय कर्जाविरुद्ध बैंकले गरेको कर्जा नोक्सानी व्यवस्था कभरेज अनुपात १०४.०९ प्रतिशत रहेको छ । त्यस्तै, बैंकको कोषको लागत ४.१२ प्रतिशतबाट घटेर ३.२७ प्रतिशत र आधार दर ५.९० प्रतिशतबाट घटेर ४.८७ प्रतिशत कायम भएको छ ।
बैंकको कर्जा–निक्षेप अनुपात ७५.२९ प्रतिशत, ब्याजदर अन्तर ३.६८ प्रतिशत, पुँजी कोष अनुपात १२.२९ प्रतिशत, टियर १ पुँजी अनुपात १०.१६ प्रतिशत र कमन इक्विटी टियर १ अनुपात ९.०३ प्रतिशत रहेको छ ।
बैंकिङ र ट्रेजरी कारोबारबाट आम्दानी
व्यावसायिक क्षेत्रगत आम्दानीमा बैंकिङ कारोबार मुख्य योगदानकर्ता बनेको छ । बैंकिङ कारोबारबाट ५ अर्ब २ करोड २६ लाख रुपैयाँ आम्दानी भएको छ भने यसबाट ६१ करोड ८० लाख रुपैयाँ करअघिको नाफा प्राप्त भएको छ ।
त्यस्तै, ट्रेजरी कारोबारबाट १ अर्ब ३८ करोड ९५ लाख रुपैयाँ आम्दानी र ५८ करोड ८७ लाख रुपैयाँ नाफा भएको छ । अन्तर्राष्ट्रिय रेमिट्यान्स कारोबारबाट १ करोड ६३ लाख रुपैयाँ आम्दानी हुँदा ३ करोड १९ लाख रुपैयाँ सञ्चालन मुनाफा देखिएको छ ।
बैंकको ५१ प्रतिशत स्वामित्व रहेको सहायक कम्पनी सिद्धार्थ क्यापिटलबाट बैंकले समीक्षा अवधिमा ३ करोड ६ लाख रुपैयाँ नगद लाभांश प्राप्त गरेको छ ।
बैंकले अघिल्लो आर्थिक वर्षको मुनाफाबाट १० प्रतिशत बोनस सेयर र करसहित १० प्रतिशत नगद लाभांश वितरण गरिसकेको छ । अग्राधिकार सेयरधनीलाई ८.२५ प्रतिशतका दरले लाभांश वितरण गरिएको बैंकले जनाएको छ ।
समग्रमा सिद्धार्थ बैंकले चालु आर्थिक वर्षको पहिलो त्रैमासमा खुद नाफा, खुद ब्याज आम्दानी, शुल्क तथा कमिसन आम्दानी र प्रतिसेयर आम्दानीमा उल्लेख्य वृद्धि गरेको छ । साथै, निष्क्रिय कर्जा अनुपात र आधार दर घट्नु तथा वितरणयोग्य मुनाफा सकारात्मक रहनुले बैंकको वित्तीय प्रदर्शनमा सुधार देखाएको छ ।
