२०८३ आश्विन ७, बुधबार ०९:१८
काठमाडौँ । काठमाडौँको प्रमुख सांस्कृतिक पर्व इन्द्रजात्रा आजदेखि औपचारिक रूपमा सुरु भएको छ। इन्द्रजात्राको सुरुवातसँगै हनुमानढोका दरबार क्षेत्रस्थित कालभैरव अगाडि विधिपूर्वक इन्द्रध्वजसहितको लिङ्गो ठड्याइएको छ।
लिङ्गो ठड्याउने कार्यलाई इन्द्रजात्राको प्रमुख सुरुवाती विधिका रूपमा लिइन्छ। परम्परागत बाजागाजासहित धार्मिक विधिअनुसार पूजा तथा अन्य संस्कार सम्पन्न गरी लिङ्गो ठड्याइएको हो। लिङ्गो ठड्याएसँगै जात्राका विभिन्न कार्यक्रम औपचारिक रूपमा अघि बढ्ने परम्परा छ।
इन्द्रजात्रा काठमाडौँ उपत्यकाको नेवार समुदायको महत्वपूर्ण सांस्कृतिक पर्व हो। जात्राका क्रममा इन्द्र, भैरव, गणेश र कुमारीको पूजा तथा रथयात्रा गरिन्छ। हनुमानढोका दरबार क्षेत्र आसपासमा विभिन्न देवीदेवताका मूर्ति तथा रथको दर्शन गर्न श्रद्धालु तथा सर्वसाधारणको भीड लाग्ने गर्छ।
जात्राका क्रममा हनुमानढोकाबाट कुमारी, गणेश र भैरवको रथ निकालेर काठमाडौँका विभिन्न टोलमा परिक्रमा गराउने परम्परा छ। यस क्रममा लाखे नाच, पुलुकिसी नाचलगायत विभिन्न सांस्कृतिक प्रदर्शनसमेत गरिन्छ।
इन्द्रजात्राले काठमाडौँको धार्मिक, सांस्कृतिक तथा ऐतिहासिक पहिचानलाई झल्काउने भएकाले जात्राका विभिन्न कार्यक्रममा स्थानीयवासीसँगै देश तथा विदेशबाट आएका पर्यटकसमेत सहभागी हुने गर्छन्।
