२०८३ श्रावण २२, शुक्रबार ०८:४७
काठमाडौं — ककरोच जनता पार्टी (सीजेपी)ले राष्ट्रिय कार्यसमिति घोषणा गर्दै देशभर संगठन विस्तार गर्ने रोडम्याप सार्वजनिक गरेको छ। पार्टीले प्रारम्भिक राष्ट्रिय नेतृत्वलाई औपचारिक रूपमा अनुमोदन गर्दै विभिन्न पदमा जिम्मेवारी बाँडफाँट गरेको हो।
पार्टीका संस्थापक अभिजित दीपके राष्ट्रिय संयोजक नियुक्त भएका छन्। आशुतोष रांका र सौरव दासलाई सह–संयोजकको जिम्मेवारी दिइएको छ। सीजेपीले बिहीबार सामाजिक सञ्जाल एक्समार्फत राष्ट्रिय कार्यसमितिको घोषणा गरेको हो।
घोषित कार्यसमितिअनुसार अजिक्य शिन्दे राष्ट्रिय संगठन प्रमुख, दीपक बालियान संगठन सह–प्रमुख, आफरिन नवाज राष्ट्रिय सचिव, विजय रेड्डी मल्लांगी सञ्चार प्रमुख, रत्ना सिंह कानुनी मामिला प्रमुख, वैष्णवी गौर अनुसन्धान तथा नीति प्रमुख, रोहन देशपाण्डे प्रविधि प्रमुख तथा योगेश इंगले वित्त प्रमुख नियुक्त भएका छन्।
पार्टीले चार क्षेत्रीय प्रमुख पनि तोकेको छ। उत्तर भारतको जिम्मेवारी दीपक बालियान, दक्षिण भारतको विजय रेड्डी मल्लांगी, पूर्वी तथा उत्तर–पूर्वी क्षेत्रको अंकित भारद्वाज र पश्चिम भारतको योगेश इंगलेलाई दिइएको छ।
सीजेपीका अनुसार राष्ट्रिय कार्यसमितिका सबै पदाधिकारी ३५ वर्षभन्दा कम उमेरका छन्। पार्टीले आगामी ६ महिनाभित्र देशभर प्रादेशिक समन्वय समिति, लोकसभा क्षेत्रस्तरीय एकाइ तथा नगरस्तरीय समन्वय समिति गठन गर्ने योजना सार्वजनिक गरेको छ।
साथै, सार्वजनिक गरिएको सूचीबाहेक अन्य कुनै व्यक्तिलाई पार्टीको पदाधिकारी नियुक्त नगरिएको स्पष्ट पार्दै आधिकारिक जानकारीमा मात्र विश्वास गर्न पार्टीले आग्रह गरेको छ।
