२०८३ श्रावण ८, शुक्रबार ०९:५८
काठमाडौं । १३ देशका राजदूत नियुक्ति प्रक्रिया चलिरहेका बेला सरकारले ६ देशमा रहेका नेपाली राजदूतलाई अर्को निर्णय नहुन्जेलसम्म स्वदेश नफर्कन भनेको छ ।
कार्यकाल पूरा गरी फर्कने तयारीमा रहेका उनीहरूलाई सरकारले अर्को निर्णय नहुन्जेलसम्म नफर्कन भनेको हो ।
बुधबार बसेको मन्त्रिपरिषद् बैठकबाट यस्तो निर्णय गरिएको हो । बहराइन, बंगलादेश, ब्राजिल, म्यानमार, अस्ट्रिया र इजिप्टका निम्ति नेपाली राजदूतलाई अर्को निर्णय नहुन्जेलसम्म नफर्कन भनिएको परराष्ट्र मन्त्रालयले जनाएको छ ।
परराष्ट्र मन्त्रालयका प्रवक्ता लोकबहादुर पौडेल क्षेत्रीले ६ देशका नेपाली राजदूतलाई अर्को निर्णय नहुन्जेलसम्म नफर्कन भनिएको जानकारी दिए ।
हाल बंगलादेशमा घनश्याम भण्डारी, बहराइनमा तीर्थराज वाग्ले, ब्राजिलमा निर्मलराज काफ्ले, म्यानमारमा हरिश्चन्द्र घिमिरे, अस्ट्रियास्थित राष्ट्रसंघीय स्थायी नियोगका स्थायी प्रतिनिधिमा भरत रेग्मी र इजिप्टका निम्ति नेपाली राजदूतमा सुशील लम्साल छन् । राजदूत नियुक्तिमा ढिलाइ भएपछि सरकारले यस्तो निर्णय गरेको बुझिएकाे छ ।
