२०८३ असार ३, बुधबार ११:०३
काठमाडौँ ।आज अन्तरराष्ट्रिय परिवार विप्रेषण दिवस (आईडीएफआर) विश्वभर विभिन्न कार्यक्रमका साथ मनाइँदै छ।
संयुक्त राष्ट्रसङ्घीय महासभाद्वारा मान्यता प्राप्त यो दिवस हरेक वर्ष जुन १६ मा मनाइन्छ। विश्वका २० करोडभन्दा बढी आप्रवासी श्रमिकले आफ्नो परिवार र समुदायको जीवनस्तर उकास्न पुर्याएको योगदानको सम्मानस्वरूप दिवस मनाउने गरिन्छ।
यस वर्ष आईडीएफआरले विप्रेषणलाई पारिवारिक खर्च धान्ने माध्यम मात्र नभई ग्रामीण उद्यमशीलता, रोजगारी सिर्जना र स्थानीय आर्थिक रूपान्तरणको महत्वपूर्ण स्रोतका रूपमा उपयोग गर्न आह्वान गरेको छ।
संयुक्त राष्ट्रसङ्घका अनुसार आप्रवासी श्रमिकले पठाउने विप्रेषणबाट विश्वभर करिब ८० करोड परिवारका सदस्य लाभान्वित छन्। विगत एक दशकमा न्यून तथा मध्यम आय भएका मुलुकहरूमा करिब पाँच खर्ब अमेरिकी डलर विप्रेषण प्रवाह भएको छ। यो रकम वैदेशिक विकास सहायता भन्दा बढी र प्रत्यक्ष वैदेशिक लगानीसरह रहेको उल्लेख छ। तीमध्ये एकतिहाइभन्दा बढी रकम ग्रामीण क्षेत्रमा पुगेको अनुमान गरिएको छ।
अभियानले विश्वको करिब ४४ प्रतिशत जनसङ्ख्या ग्रामीण क्षेत्रमा बसोबास गर्ने र अत्यधिक गरिबीमा रहेका झण्डै ८० प्रतिशत मानिस पनि यिनै क्षेत्रमा केन्द्रित रहेको जनाएको छ। जलवायुजन्य विपद्, बजार अस्थिरता र आर्थिक जोखिमको सामना गरिरहेका ग्रामीण क्षेत्र विकासका अपार सम्भावना बोकेका क्षेत्रका रूपमा प्रस्तुत गरिएका छन्।
हाल न्यून तथा मध्यम आय भएका मुलुकहरूमा वार्षिक करिब ७०० अर्ब अमेरिकी डलर बराबरको विप्रेषण भित्रिने गरेको छ। सन् २०३० सम्म थप ४ खर्ब ४० अर्ब अमेरिकी डलर विप्रेषण यस्ता मुलुकहरूमा प्रवाह हुने अनुमान गरिएको छ।
दिगो विकास लक्ष्य १०(सी) अन्तर्गत विप्रेषण कारोबारको लागत तीन प्रतिशतभन्दा कममा झार्ने तथा पाँच प्रतिशतभन्दा बढी लागत लाग्ने मार्गहरू हटाउने लक्ष्य राखिएको छ। विप्रेषणले गरिबी न्यूनीकरण, खाद्य सुरक्षा, शिक्षा, स्वास्थ्य, आवास तथा आर्थिक स्थायित्वमा प्रत्यक्ष र अप्रत्यक्ष योगदान पुर्याउने उल्लेख गरिएको छ।
अभियानले निजी क्षेत्रलाई सस्तो, पहुँचयोग्य र प्रतिस्पर्धी विप्रेषण सेवा विस्तार गर्न, विप्रेषणसँग सम्बन्धित वित्तीय उत्पादन विकास गर्न तथा प्रवासी समुदायको पूँजी र उद्यमशीलतालाई ग्रामीण बजार सुदृढीकरणमा परिचालन गर्न आग्रह गरेको छ। सार्वजनिक क्षेत्रलाई डिजिटल वित्तीय समावेशीकरण, लगानीमैत्री नीति तथा ग्रामीण बजार एकीकरणका लागि आवश्यक पूर्वाधार विकास गर्न सुझाव दिइएको छ।
हाल विप्रेषणको करिब ७५ प्रतिशत हिस्सा परिवारका तत्कालीन आवश्यकतामा खर्च हुने गरेको छ भने बाँकी २५ प्रतिशत अर्थात् वार्षिक १०० अर्ब अमेरिकी डलरभन्दा बढी रकम बचत तथा लगानीमा उपयोग हुन सक्ने अनुमान छ। उपयुक्त वित्तीय सेवा र लगानीका अवसर उपलब्ध भए विप्रेषणलाई दीर्घकालीन आर्थिक विकास, उद्यम विस्तार र रोजगारी सिर्जनाको आधार बनाउन सकिने अभियानको निष्कर्ष छ।
विश्वका ८० भन्दा बढी मुलुकको कुल गार्हस्थ्य उत्पादनमा विप्रेषणको हिस्सा कम्तीमा तीन प्रतिशत रहेको छ भने ३० वटा मुलुकमा यो हिस्सा १० प्रतिशतभन्दा बढी छ। यसले विप्रेषण सामाजिक–आर्थिक रूपान्तरणको महत्वपूर्ण आधार बनेको देखाउँछ। विशेषगरी ग्रामीण क्षेत्रमा विप्रेषणले आर्थिक गतिविधि विस्तार, जीविकोपार्जन सुधार तथा समुदायको उत्थानमा महत्वपूर्ण भूमिका खेलेको तथ्याङ्कले देखाएको छ।
