२०८३ जेष्ठ ४, सोमबार १५:२७
काठमाडौं । इरानको नियन्त्रणमा रहेका नेपाली नागरिक अमृत झा रिहाइका सम्बन्धमा मन्त्री शिशिर खनालले दिएको अभिव्यक्तिप्रति परराष्ट्र मन्त्रालयले माफी मागेको छ।
मन्त्रालयले इरानको स्थानीय अदालतमा झाविरुद्धको मुद्दा विचाराधीन रहेको र उनी रिहा भएको भन्दै यसअघि परराष्ट्रमन्त्री खनालले सार्वजनिक गरेको विज्ञप्तिप्रति माफी मागेको हो।
सोमबार विज्ञप्ति जारी गर्दै मन्त्रालयले १५ अप्रिलमा इरानका लागि नेपाली अनररी कन्सल साहराम सान्तिएले कतारस्थित नेपाली कार्यवाहक राजदूत कुमार राईलाई झाको रिहाइबारे जानकारी प्राप्त भएको र उनी रिहा भएको खबर पठाएको जनाएको छ। त्यसैलाई आधार मानेर सम्बन्धित महाशाखा प्रमुखबाट परराष्ट्रमन्त्री खनाल र सचिव अमृतबहादुर राईलाई जानकारी गराइएको मन्त्रालयले जनाएको छ। मन्त्रालयले झाको परिवारलाई समेत उक्त जानकारी गराएको थियो।
मन्त्रालयले झा रिहा भएको अनौपचारिक जानकारी प्राप्त भएको भन्दै विज्ञप्ति जारी गरेको थियो। उक्त जानकारीकै आधारमा परराष्ट्रमन्त्री खनालले आफ्नो सामाजिक सञ्जालबाट पनि यो विषय सार्वजनिक गरेको मन्त्रालयको जिकिर छ।
झालाई नेपाल फिर्ता ल्याउने प्रक्रिया पूरा गर्ने प्रयोजनका लागि नेपाली दूतावास, दोहालाई मन्त्रालयले लिखित प्रमाण उपलब्ध गराउन निर्देशन दिएको थियो। तर, केही दिनपछि मन्त्रालयले झा रिहा नभएको जानकारी पाएको थियो।
इरानको क्वेसहम् टापुमा अवैध सामान तस्करी एवम् ओसारपसारको आरोपमा झा पक्राउ परेको र उनी बन्दर अब्बासमा पुर्पक्षका लागि थुनामा रहेका मन्त्रालयले जानकारी दिएको छ।
इरानी अदालतले झाको मुद्दामा विज्ञको प्रतिवेदन तयार गर्न आदेश दिएको छ। मन्त्रालयका अनुसार विज्ञ प्रतिवेदनका लागि गठित विज्ञ टोलीले प्रतिवेदन तयार गरी अदालतमा बुझाउने क्रममा रहेको छ।
