काठमाडौं । गत फागुन २१ को निर्वाचनमा अप्रत्यासित पराजयको सामना गर्नुृपरेपछि विगतका ठूला भनिएका कांग्रेस, एमाले, नेकपा र राप्रपामा ठूलो हलचल मच्चिएको छ । अहिलेसम्म कुनै पनि दल विभाजन भइसकेका भने छैनन् । तर एकढिक्का पनि छैनन् । नेताहरूबीच सम्बन्ध राम्रो छैन ।

कांग्रेसमा विशेष महाधिवेशनले ल्याएको तरंगको असर अहिलेसम्म कायमै छ । गगन थापा नेतृत्वको कांग्रेसलाई स्वीकार्न शेरबहादुर देउवा पक्षका पूर्णबहादुर खड्का, विमलेन्द्र निधि, प्रकाशमान सिंह, कृष्णप्रसाद सिटौलालगायतलाई अप्ठेरो परिरहेको छ । सोही कारण उनीहरू अदालतसम्म पुगेका थिए ।

एमालेमा अध्यक्ष केपी ओलीलाई हटाउने प्रयत्न भइरहेको छ । त्यसका लागि उपाध्यक्ष विष्णु पौडेल, महासचिव शंकर पोखरेल, उपमहासचिव योगेश भट्टराईलगायतको मोर्चाबन्दी सुरु भएको छ । एमालेको एउटा पक्ष भने प्रचण्ड नेतृत्वको नेकपासँग एकताको तयारीमा लागेको छ । तर त्यही नेकपामा पनि निर्वाचनमा करारी हार वेहोरेको भन्दै नेतृत्वको विकल्प खोज्दै छ । प्रचण्ड र माधवकुमार नेपाललाई नेतृत्व छाड्न दबाब परेको छ ।

राष्ट्रिय प्रजातन्त्र पार्टीभित्र बढ्दो आन्तरिक असन्तुष्टिका बीच पार्टीले अनुशासन समितिको बैठक बोलाएको छ । सोमवार दिउँसो धुम्बाराहीस्थित पार्टी कार्यालयमा बस्ने बैठकमा संगठनभित्र देखिएका अनुशासनसम्बन्धी विषयहरूमा गम्भीर छलफल हुने बताइएको छ ।
पार्टीभित्र पछिल्लो समय देखिएको विवाद र मतभेदलाई मध्यनजर गर्दै बस्न लागेको यो बैठकलाई अर्थपूर्ण रूपमा हेरिएको छ । विशेषगरी नेतृत्वको कार्यशैलीलाई लिएर उठिरहेका प्रश्नहरूले आन्तरिक वातावरण केही तनावपूर्ण बनेको छ ।

महामन्त्री धवलशमशेर राणाले जेठभित्र महाधिवेशन नगरे पार्टी कमजोर बन्ने चेतावनी दिएपछि विवाद अझ चर्किएको छ। यसै सन्दर्भमा बैठकमा अनुशासनका विषय मात्र नभई समग्र संगठनात्मक अवस्थाबारे पनि छलफल हुने संकेत देखिएको छ ।

अध्यक्ष राजेन्द्र लिङ्देन पक्ष राणालगायतको समूहलाई कारबाही गर्ने निष्कर्षमा पुगिसकेको छ । यदि आज अनुशासन समितिको बैठकले राणालगायत पाँचजनालाई स्पष्टीकरण सोधे राप्रपा पनि विभाजनको डिलमा पुग्ने अनुमान गरिएको छ ।