२०८२ फाल्गुन ७, बिहीबार १८:३९
काठमाडौं । नेपाली कांग्रेस ले प्रतिनिधिसभा निर्वाचनका लागि आफ्नो २०० पृष्ठ लामो विस्तृत प्रतिज्ञापत्र सार्वजनिक गरेको छ। बिहीबार सार्वजनिक गरिएको उक्त प्रतिज्ञापत्र सुशासन, भ्रष्टाचार नियन्त्रण, आर्थिक पुनरुत्थान र सामाजिक सुरक्षाजस्ता विषयमा केन्द्रित रहेको जनाएको छ।
कांग्रेसले प्रतिज्ञापत्रमार्फत २०४८ सालयता सार्वजनिक पद धारण गरेका सबै उच्च पदस्थ व्यक्तिहरूको सम्पत्ति छानबिन गर्न उच्चस्तरीय न्यायिक आयोग गठन गर्ने घोषणा गरेको छ। सुशासनलाई प्राथमिक एजेन्डा बनाउँदै पार्टीले सार्वजनिक जीवनमा पारदर्शिता, जवाफदेहिता र विधिको शासन सुदृढ गर्ने प्रतिबद्धता जनाएको छ। भ्रष्टाचार नियन्त्रणका लागि कानुनी तथा संस्थागत सुधार गर्ने, अनुसन्धान निकायहरूलाई थप सशक्त बनाउने र दण्डहीनता अन्त्य गर्ने विषयमा पनि स्पष्ट नीति प्रस्तुत गरिएको छ।
‘आर्थिक पुनरुत्थानको दशक’ घोषणा
प्रतिज्ञापत्रमा आर्थिक र विकासको पक्षलाई विशेष प्राथमिकतामा राखिएको छ। आगामी पाँच वर्षलाई ‘आर्थिक पुनरुत्थानको दशक’ घोषणा गर्दै कांग्रेसले वार्षिक ७ प्रतिशतभन्दा माथिको आर्थिक वृद्धिदर हासिल गर्ने लक्ष्य लिएको छ। अर्थतन्त्रको आकार दोब्बर बनाउने दीर्घकालीन लक्ष्यसहित उत्पादन, लगानी, निर्यात प्रवर्द्धन र पूर्वाधार विस्तारमा जोड दिइने उल्लेख गरिएको छ।
कांग्रेसले निजी क्षेत्रसँग सहकार्य गर्दै उद्योग, पर्यटन, कृषि र सूचना प्रविधिलगायत क्षेत्रलाई उच्च प्राथमिकतामा राख्ने जनाएको छ। लगानीमैत्री वातावरण निर्माण, प्रशासनिक झन्झट कम गर्ने र वैदेशिक लगानी भित्र्याउने नीति पनि प्रतिज्ञापत्रमा समावेश गरिएको छ।
पाँच वर्षमा १५ लाख रोजगारी सिर्जना गर्ने लक्ष्य
स्वदेशमै सम्मानजनक रोजगारी सिर्जना गर्ने लक्ष्यसहित ‘जहाँ रोजगारी, त्यहाँ कांग्रेस’ भन्ने नीतिगत नारासमेत अघि सारिएको छ। पाँच वर्षभित्र कम्तीमा १५ लाख नयाँ रोजगारी सिर्जना गर्ने महत्वाकांक्षी योजना कांग्रेसले सार्वजनिक गरेको छ।
यसका लागि कृषि आधुनिकीकरण, साना तथा मझौला उद्योग प्रवर्द्धन, स्टार्टअपलाई प्रोत्साहन, सीप विकास तालिम तथा उद्यमशीलता अभिवृद्धिमा जोड दिइने उल्लेख गरिएको छ। विदेश पलायन रोक्न आन्तरिक उत्पादन र सेवा क्षेत्र विस्तारमा केन्द्रित हुने नीति प्रतिज्ञापत्रमा समेटिएको छ।
पर्यटन क्षेत्रमा १० वर्षभित्र वार्षिक ३० लाख पर्यटक भित्र्याउने लक्ष्य राखिएको छ। साथै, ऊर्जा क्षेत्रमा विद्युत् उत्पादन क्षमता १५ हजार मेगावाट पुर्याउने लक्ष्यसहित जलविद्युत् आयोजना तीव्र गतिमा अघि बढाइने प्रतिबद्धता गरिएको छ।
सामाजिक सुरक्षामा ‘कोखदेखि शोकसम्म’ अवधारणा
सामाजिक सुरक्षाका क्षेत्रमा कांग्रेसले ‘कोखदेखि शोकसम्म’ को एकीकृत अवधारणा अघि सारेको छ। यसअन्तर्गत ३ वर्षमुनिका बालबालिका र ७३ वर्षमाथिका ज्येष्ठ नागरिकको निःशुल्क उपचार सुनिश्चित गर्ने प्रतिबद्धता गरिएको छ।
क्यान्सर, मिर्गौला जस्ता गम्भीर रोगका बिरामीलाई उपचार खर्च सहयोग गर्ने र विपन्न वर्गका नागरिकलाई निःशुल्क स्वास्थ्य बिमा उपलब्ध गराउने योजना पनि प्रतिज्ञापत्रमा समावेश गरिएको छ। शिक्षा, स्वास्थ्य, सामाजिक सुरक्षा भत्ता तथा न्यून आय भएका परिवारलाई लक्षित कार्यक्रमहरूलाई सुदृढ गर्ने प्रतिबद्धता कांग्रेसले जनाएको छ।
सुशासनमार्फत विकासको प्रतिबद्धता
कांग्रेसले लोकतान्त्रिक मूल्यमान्यता र संवैधानिक संस्थाहरूको सुदृढीकरणलाई विकासको आधारका रूपमा लिएको उल्लेख गरेको छ। राज्य संयन्त्रलाई पारदर्शी, उत्तरदायी र जनमुखी बनाउँदै समावेशी विकासमार्फत समृद्ध नेपाल निर्माण गर्ने लक्ष्य पार्टीले प्रतिज्ञापत्रमार्फत सार्वजनिक गरेको हो।
आगामी प्रतिनिधिसभा निर्वाचनलाई लक्षित गर्दै सार्वजनिक गरिएको यो विस्तृत प्रतिज्ञापत्रमार्फत कांग्रेसले आर्थिक सुधार, रोजगारी सिर्जना, सामाजिक सुरक्षा विस्तार र सुशासनलाई आफ्नो प्रमुख एजेन्डाका रूपमा अघि सारेको छ। अब मतदाताले उक्त प्रतिबद्धतालाई कसरी मूल्याङ्कन गर्छन् भन्ने विषय निर्वाचन परिणामसँगै स्पष्ट हुनेछ।
