२०८३ कार्तिक १९, बिहिवार १२:५०
काठमाडौं । दुई दिने औपचारिक भ्रमणका क्रममा नेपाल आएका भारतीय विदेश सचिव विक्रम मिश्रीले बिहीबार बिहान प्रधानमन्त्री बालेन शाहसँग शिष्टाचार भेटवार्ता गरेका छन्।सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा नेपाल–भारतबीचको ऐतिहासिक द्विपक्षीय सम्बन्धलाई थप सुदृढ र विस्तार गर्ने विषयमा छलफल भएको छ।
भेटका क्रममा मिश्रीले भारत सरकारका तर्फबाट नेपालको विकास र समृद्धिका लागि निरन्तर सहकार्य गर्ने प्रतिबद्धता व्यक्त गरेका छन्। प्रधानमन्त्री शाह र भारतीय विदेश सचिव मिश्रीबीच दुई देशको आपसी हित, कनेक्टिभिटी, व्यापार तथा सांस्कृतिक सम्बन्धका विभिन्न पक्षमा सकारात्मक कुराकानी भएको प्रधानमन्त्रीको सचिवालयले जनाएको छ।
बुधबार काठमाडौं आइपुगेका मिश्रीले आफ्नो दुई दिने भ्रमणका क्रममा नेपालका उच्च राजनीतिक तथा कूटनीतिक नेतृत्वसँग भेटघाट गरिरहेका छन्। उनको भ्रमणलाई दुई देशबीचको कूटनीतिक संवाद र आपसी सहकार्यलाई थप गति दिने महत्वपूर्ण अवसरका रूपमा हेरिएको छ।
नेपाल र भारतबीच खुला सीमा, व्यापार, पारवहन, ऊर्जा, पूर्वाधार विकास तथा सांस्कृतिक सम्बन्धका कारण बहुआयामिक सम्बन्ध रहँदै आएको छ। पछिल्लो समय कनेक्टिभिटी विस्तार, ऊर्जा व्यापार र विकास आयोजनामा सहकार्यका विषय पनि दुई देशबीचको संवादका महत्वपूर्ण प्राथमिकताका रूपमा रहेका छन्।
भारतीय विदेश सचिवको यस भ्रमणलाई दुई देशबीचका बाँकी रहेका द्विपक्षीय विषयमा समझदारी निर्माण गर्ने तथा उच्चस्तरीय संवादलाई निरन्तरता दिने अवसरका रूपमा कूटनीतिक वृत्तले हेरेको छ।
