२०८३ श्रावण ११, सोमबार १२:००
काठमाडौँ । सुनसरीमा भएको हिंसात्मक घटनाको छानबिन गरी दीर्घकालीन समाधानका उपायसहित सुझाव पेस गर्न गृह मन्त्रालयले पाँच सदस्यीय छानबिन समिति गठन गरेको छ ।
सोमबार बिहान गृहमन्त्री सुदन गुरुङको उपस्थितिमा बसेको बैठकले गृह मन्त्रालयका सहसचिवको नेतृत्वमा पाँच सदस्यीय समिति गठन गर्ने निर्णय गरेको हो।
समितिलाई घटनाको सत्यतथ्य छानबिन गरी भविष्यमा यस्ता घटना हुन नदिन आवश्यक दीर्घकालीन उपाय तथा सुझावसहित सात दिनभित्र प्रतिवेदन पेस गर्ने कार्यादेश दिइएको छ ।
गृह मन्त्रालयका सूचना अधिकारी रमा आचार्य सुवेदीका अनुसार सोमबार बेलुका ५ बजे केन्द्रीय सुरक्षा समितिको बैठक बोलाइएको छ । बैठकमा सुनसरीको पछिल्लो सुरक्षा अवस्था, घटनापछिको परिस्थितिको समीक्षा तथा आवश्यक सुरक्षा व्यवस्थाबारे छलफल हुने जनाइएको छ ।
देवानगन्ज गाउँपालिका–३ कप्तानगञ्जमा आइतबार राति दुई समूहबीच भएको झडपमा एकजनाको मृत्यु भएको थियो । केही सर्वसाधारण तथा सुरक्षाकर्मी घाइते भएका छन् ।
घटनापछि जिल्ला प्रशासन कार्यालय सुनसरीले देवानगन्ज र हरिनगर गाउँपालिकाका केही क्षेत्रमा अनिश्चितकालीन कर्फ्यु आदेश जारी गरेको छ।
प्रशासनले सर्वसाधारणलाई कर्फ्यु आदेशको पूर्ण पालना गर्न तथा अत्यावश्यक कामबाहेक घरबाहिर ननिस्कन आग्रह गरेको छ ।
