२०८२ फाल्गुन २९, शुक्रवार १९:२३
काठमाडौं। संघीय लोकतान्त्रिक मोर्चाले राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह प्रधानमन्त्री बन्ने हर्ष व्यक्त गरेको छ। जसपा नेपालका संरक्षक महन्थ ठाकुरको अध्यक्षतामा शुक्रवार बसेको मुल समितिको बैठकले शाहको नेतृत्वलाई आम जनताले व्यापक जनसमर्थन दिएको उल्लेख गर्दै यसलाई मधेशी, थारू, आदिवासी र उत्पीडित समुदायको लामो समयदेखि चलेको संघर्षको मान्यता भएको ठहर गरेको छ।
मोर्चाले जारी गरेको विज्ञप्तिमा भनिएको छ, “प्रतिनिधिसभा सदस्य निर्वाचन २०८२ मा मधेशी सपूत मा. बालेन्द्र शाह (बालेन) को नेतृत्वलाई आम जनताले व्यापक जनसमर्थन प्रदान गरेकोले उनलाई प्रधानमन्त्रीको रूपमा हेर्न पाउनु हाम्रो लागि हर्षको विषय हो।”
मोर्चाले यस अवसरमा बालेन्द्र शाहलाई शुभकामना तथा बधाई दिएको छ। साथै आगामी दिनमा संविधान संशोधन, सिमांकन हेरफेर, जनसंख्याको आधारमा प्रतिनिधित्व, लाल आयोगको प्रतिवेदन सार्वजनिक गर्ने, संघीयतालाई अझ बलियो बनाउने लगायतका विविध विषयमा सकारात्मक कदम चालिने अपेक्षा व्यक्त गरेको छ।
विज्ञप्तिमा थप भनिएको छ, “नेपाली जनताले विगत लामो समयदेखि गरेको संघर्ष र बलिदानबाट स्थापित गणतन्त्र, संघीयता, लोकतन्त्र र समावेशीताका उपलब्धिहरूलाई संस्थागत गर्दै आगामी दिनमा समावेशी र न्यायसंगत व्यवस्था कायम राख्ने विश्वास व्यक्त गर्दछौं।”
विशेषगरी मोर्चाले मधेशी, थारू, आदिवासी र अन्य उत्पीडित समुदायको प्रतिनिधित्व सुनिश्चित गर्न बालेन्द्र शाहको नेतृत्वलाई महत्त्वपूर्ण कदम ठहर गरेको छ। राजनीतिक विश्लेषकहरूले पनि शाहको प्रधानमन्त्री बन्ने प्रक्रियाले समुदायबीच समावेशी नेतृत्व र संघीयतालाई थप बलियो बनाउने सम्भावना बढाउने बताएका छन्।
यससँगै मोर्चाले आगामी दिनमा संवैधानिक सुधार, क्षेत्रीय सिमांकन, प्रतिनिधित्व व्यवस्था सुधार र अन्य सामाजिक न्याय सम्बन्धी विषयमा सरकारसँग सहकार्य गर्ने प्रतिबद्धता व्यक्त गरेको छ।
साथै मोर्चाले सम्पूर्ण जनतासँग आह्वान गरेको छ कि नयाँ नेतृत्वले स्थापित लोकतान्त्रिक प्रणाली र संघीयताको रक्षा गर्दै समावेशी र न्यायसंगत नेपाल निर्माणमा सबैले सहकार्य गर्नु आवश्यक रहेको छ।
