काठमाडौं । राष्ट्रिय स्वतन्त्र पार्टीका कार्यकर्ताले आफ्नो पार्टीको झण्डा जलाएको भन्दै एमालेले कडा आपत्ति जनाएको छ।

बिहीबार राति दाङको तुलसीपुरमा रास्वपाका कार्यकर्ताले एमालेको चुनाव चिन्ह सूर्यअंकित झण्डा जलाएको भन्दै पार्टीले शुक्रबार विज्ञप्ति जारी गर्दै भर्त्सना गरेको हो।

एमाले निर्वाचन परिचालन कमिटीका प्रेस संयोजक मीनबहादुर शाहीले जारी गरेको विज्ञप्तिमा रास्वपाका कार्यकर्ताले एमाले अध्यक्ष केपी ओलीविरुद्ध अपाच्य शब्दहरूका साथ नाराबाजी गर्दै महासचिव शंकर पोखरेलको गृहनगरमा अराजक शैली प्रदर्शन गरेको उल्लेख छ। एमालेले यस घटनालाई राज्य, जनता, लोकतन्त्र र संविधानविरुद्धको अपराधजन्य कार्यको संज्ञा दिएको छ।

‘लाखौं जनतामा लोकप्रिय हाम्रो पार्टीको आस्थामा चोट पुर्‍याउने गरी झण्डामा आगो लगाउनेहरू उनै देश जलाउनेहरू हुन् भन्ने यो घटनाले पुष्टि गरेको छ,’ विज्ञप्तिमा भनिएको छ ।

बिहीबार बेलुकी तुलसीपुरको वीरेन्द्र चोकमा रास्वपा सभापति रवि लामिछानेका समर्थकहरू भेला भएकामध्ये केहीले एमाले अध्यक्ष केपी ओलीविरूद्ध चर्को नाराबाजी गर्दै चुनाव चिह्न सूर्य अंकित झण्डा जलाइदिएका थिए।

एमालेले यसलाई लोकतन्त्रको परिधिबाहिरको कार्य भन्दै रास्वपाको यो हर्कतले मुलुकलाई अस्थिरताको चक्रव्यूहमा फसाउने र चुनावी द्वन्द्व निम्त्याउने प्रयास गरेको आरोप लगाएको छ।

दलीय प्रतिस्पर्धाबाट श्रेष्ठता हासिल गर्नु लोकतन्त्रको सुन्दर पक्ष भए पनि रास्वपाले नयाँको नाममा एउटा स्थापित राष्ट्रिय शक्तिको आस्थामा चोट पुर्‍याउने काम गरेको एमालेको ठहर छ। एमालेले आफू अनुशासित पार्टी भएको तर संयमतालाई कमजोरी नठान्न चेतावनीसमेत दिएको छ।

घटनामा संलग्नहरूको तत्काल पहिचान गरी कानुनी दायरामा ल्याउन सम्बन्धित निकायको ध्यानाकर्षणसमेत एमालेले गराएको छ । एमाले निकट युथ भोलेन्टियर्स, अखिललगायतले पनि रास्वपालाई झन्डा जलाउनेमाथि कारबाही गर्न र माफी माग्न चेतावनी दिएका छन् ।