२०८३ असार २, मंगलवार ०८:१६
काठमाडौं। विश्वकप फुटबलअन्तर्गत साउदी अरेबिया र उरुग्वेबीचको खेल १–१ को बराबरीमा टुंगिएको छ। अमेरिकाको मायामीमा सम्पन्न खेलमा दुवै टोलीले एक–एक अंक बाँडेका हुन्।
प्रतिस्पर्धात्मक खेलको पहिलो हाफमा साउदी अरेबियाले अग्रता बनाएको थियो। खेलको ४१औँ मिनेटमा अब्दुलेला अलमरीले गोल गर्दै साउदीलाई १–० को अग्रता दिलाएका थिए। पहिलो हाफभर साउदीले रक्षात्मक रूपमा उत्कृष्ट प्रदर्शन गर्दै अग्रता जोगाएको थियो।
दोस्रो हाफमा उरुग्वेले खेलमा फर्किने प्रयासस्वरूप लगातार आक्रामक खेल प्रस्तुत गर्यो। बल नियन्त्रण र आक्रमणमा दबाब बनाएको उरुग्वेले अन्ततः खेलको ८०औँ मिनेटमा बराबरी गोल गर्न सफल भयो। मेक्सी आराहोले गोल गर्दै खेललाई १–१ को अवस्थामा पुर्याएका थिए।
त्यसपछि उरुग्वेले जितका लागि थप दबाब सिर्जना गरे पनि साउदीको रक्षापंक्तिले उत्कृष्ट प्रदर्शन गर्दै थप गोल हुन दिएन। निर्धारित समयसम्म कुनै टोलीले निर्णायक गोल गर्न नसकेपछि खेल बराबरीमा सकिएको हो।
बराबरीसँगै दुवै टोलीले प्रतियोगितामा एक–एक अंक जोडेका छन्। खेलमा उरुग्वेले दोस्रो हाफमा आक्रामक प्रदर्शन गरे पनि फिनिसिङमा कमजोरी देखिँदा पूर्ण तीन अंक हासिल गर्न सकेन।
