२०८३ बैशाख १७, बिहिवार १४:२४
काठमाडौं । सम्पत्ति शुद्धीकरण अनुसन्धान विभागले विवादास्पद व्यवसायी दीपक भट्ट संलग्न रहेको अन्य कम्पनीहरूको संस्थापक सेयरधनीसम्बन्धी विवरण पनि माग गरेको छ।
विभागबाट भइरहेको अनुसन्धानका क्रममा अध्ययन प्रयोजनका लागि विवरण आवश्यक परेकाले भट्ट संलग्न रहेका विभिन्न कम्पनीका संस्थापक सेयर खरिद गर्ने व्यक्तिहरूसँग सम्बन्धित सम्पूर्ण विवरण पेस गर्न सार्वजनिक सूचना जारी गरेको हो।
सूचनाअनुसार नेपाल माइक्रो इन्सुरेन्स कम्पनी लिमिटेड, गार्डियन माइक्रो लाइफ इन्सुरेन्स, क्रेष्ट माइक्रो लाइफ इन्सुरेन्स, लिबर्टी माइक्रो लाइफ इन्सुरेन्स, प्रोटेक्टिभ इन्सुरेन्स कम्पनी, स्टार माइक्रो इन्सुरेन्स कम्पनी, ट्रस्ट माइक्रो इन्सुरेन्स कम्पनी तथा हिमालयन रिइन्सुरेन्स कम्पनीको संस्थापनाकालमा संस्थापक सेयर खरिद गरेका व्यक्तिहरूको विवरण माग गरिएको छ।
विभागका अनुसार बिमा प्राधिकरणबाट अनुमति लिने क्रममा संस्थापक सेयर खरिदकर्ताले चुक्ता पूँजीबाहेक अतिरिक्त शुल्क (प्रिमियम) बापत विभिन्न व्यक्ति वा संस्थाका बैंक खातामा जम्मा गरेको रकमसम्बन्धी विवरण आवश्यक परेको छ।
‘कति रकम, कसको नाममा रहेको, कुन बैंक तथा वित्तीय संस्थाको कुन खातामा जम्मा गरिएको हो’ भन्ने सम्पूर्ण विवरण सूचनामा स्पष्ट रूपमा उपलब्ध गराउन आग्रह गरिएको छ।
विभागले सूचना प्रकाशित भएको मितिले १५ दिनभित्र कार्यालयमा उपस्थित भई वा आवश्यक कागजातसहित विवरण बुझाउन सम्बन्धित पक्षलाई निर्देशन दिएको छ।
भट्ट अहिले सीआइबीको हिरासतमा छन् । उनीमाथि हिमालयन रिइन्स्योरेन्सको संस्थापक सेयर खरिदका विषयमा अनुसन्धान भइरहेको छ ।
