२०८३ कार्तिक ६, बिहीबार १०:३०
काठमाडौँ । नेपाल प्रिमियर लिग (एनपिएल) को तेस्रो संस्करण नजिकिँदै गर्दा कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानको स्तरोन्नति तथा व्यवस्थापनको काम अन्तिम चरणमा पुगेको छ । प्रतियोगिता सुरु हुन केही दिन मात्र बाँकी रहँदा आवश्यक पूर्वाधार निर्माण र व्यवस्थापनका काम लगभग सम्पन्न भएका छन् ।
नेपाल क्रिकेट संघ (क्यान) ले यसपटक विगतका संस्करणमा देखिएका व्यवस्थापनसम्बन्धी कमजोरी सुधार गर्दै दर्शक, खेलाडी, सञ्चारकर्मी तथा विशिष्ट पाहुनाका लागि सहज वातावरण तयार गर्ने जनाएको छ ।
एनपिएलका प्रत्येक संस्करणसँगै दर्शकको आकर्षण र सहभागिता बढ्दै गएकाले यसपटक दर्शकको अनुभवलाई विशेष प्राथमिकता दिइएको क्यानले जनाएको छ । खेल हेर्न मैदान पुग्ने दर्शकले सहज रूपमा प्रवेश पाउने, व्यवस्थित ढङ्गले खेल अवलोकन गर्ने र फर्किने वातावरण बनाउन तयारी भइरहेको छ ।
दर्शक क्षमता बढाउने प्रयास
एनपिएलका खेलमा दर्शकको चाप अत्यधिक हुने भएकाले उपलब्ध स्थानको अधिकतम उपयोग गर्दै दर्शक क्षमता बढाउने प्रयास भइरहेको छ ।
टिकट काटेर मैदान पुग्ने दर्शकलाई प्रवेशद्वारदेखि दर्शकदीर्घासम्म सहज पहुँच उपलब्ध गराउने र खेल सकिएपछि बाहिरिने प्रक्रियालाई समेत व्यवस्थित बनाउने गरी व्यवस्थापनमा ध्यान दिइएको छ ।
क्यानले विगतका संस्करणबाट प्राप्त अनुभवका आधारमा यसपटक मैदानको पूर्वाधार र सेवा व्यवस्थापनमा सुधार गर्ने प्रयास गरेको हो । प्रतियोगितालाई थप व्यवस्थित र दर्शकमैत्री बनाउने लक्ष्यसहित तयारी अघि बढाइएको छ ।
एनपिएलको तेस्रो संस्करणमा मैदान व्यवस्थापन, दर्शकको सुविधा र समग्र प्रतियोगिताको सञ्चालन कति प्रभावकारी हुन्छ भन्ने विषय प्रतियोगिता सुरु भएपछि स्पष्ट हुनेछ ।
