२०८३ आश्विन ६, मंगलवार १५:४१
काठमाडौं । सरकारले लक्षित वर्ग तथा क्षेत्रलाई उपलब्ध गराउँदै आएको सहुलियतपूर्ण कर्जा कार्यक्रममा ४३ हजारभन्दा बढी ऋणी सहभागी भएका छन्। चालु आर्थिक वर्षको साउन मसान्तसम्म ४३ हजार ५१ जना ऋणीले कुल ६५ अर्ब ४० करोड रुपैयाँभन्दा बढी कर्जा स्वीकृति पाएका छन्।
नेपाल राष्ट्र बैंकका अनुसार स्वीकृत कर्जामध्ये ३२ अर्ब ९ करोड रुपैयाँभन्दा बढी कर्जा लगानी भइसकेको छ। सहुलियतपूर्ण कर्जाको ठूलो हिस्सा व्यावसायिक कृषि तथा पशुपन्छी कर्जा र महिला उद्यमशील कर्जामा केन्द्रित रहेको देखिएको छ।
व्यावसायिक कृषि तथा पशुपन्छी कर्जातर्फ मात्रै १८ हजार ३४२ जना ऋणीले ४० अर्ब १८ करोड १७ लाख रुपैयाँभन्दा बढी कर्जा स्वीकृति पाएका छन्। यसमध्ये २६ अर्ब ७० करोड ६४ लाख रुपैयाँभन्दा बढी कर्जा बक्यौता रहेको राष्ट्र बैंकले जनाएको छ।
त्यस्तै, महिला उद्यमशील कर्जातर्फ २४ हजार १७८ जना ऋणीले २४ अर्ब ३८ करोड ७५ लाख रुपैयाँभन्दा बढी कर्जा स्वीकृति पाएका छन्। यस शीर्षकमा ५ अर्ब ७३ करोड ८३ लाख रुपैयाँभन्दा बढी कर्जा बक्यौता रहेको छ।
सहुलियतपूर्ण कर्जा कार्यक्रमअन्तर्गत शिक्षित युवा स्वरोजगार कर्जातर्फ ७१ जना ऋणीले २ करोड ४५ लाख ३१ हजार रुपैयाँभन्दा बढी कर्जा स्वीकृति पाएका छन्। विदेशबाट फर्केका युवा परियोजना कर्जातर्फ १२३ जना ऋणीले ९ करोड ५९ लाख ३८ हजार रुपैयाँभन्दा बढी कर्जा स्वीकृति पाएका छन्।
दलित समुदाय व्यवसाय विकास कर्जातर्फ २३९ जना ऋणीले १६ करोड ४७ लाख ३४ हजार रुपैयाँभन्दा बढी कर्जा स्वीकृति पाएका छन्। उच्च तथा प्राविधिक एवं व्यावसायिक शिक्षा कर्जातर्फ १५ जना र भूकम्पपीडितको निजी आवास निर्माण कर्जातर्फ १४ जना ऋणीले पनि कर्जा स्वीकृति पाएका छन्।
राष्ट्र बैंकका अनुसार कपडा उद्योग सञ्चालनका लागि ५२ जना ऋणीले ५२ करोड ९१ लाख १५ हजार रुपैयाँभन्दा बढी कर्जा स्वीकृति पाएका छन्। युवा स्वरोजगार कर्जातर्फ १७ जना ऋणीले ७९ लाख रुपैयाँ कर्जा स्वीकृति पाएका छन्।
राष्ट्रिय वाणिज्य र कृषि विकास बैंक अगाडि
सहुलियतपूर्ण कर्जा उपयोग गर्ने ऋणीको संख्या सबैभन्दा धेरै राष्ट्रिय वाणिज्य बैंकमा देखिएको छ। उक्त बैंकबाट ५ हजार ११३ जना ऋणीले सहुलियतपूर्ण कर्जा उपयोग गरेका छन्।
त्यस्तै, कृषि विकास बैंकबाट ५ हजार ८० जना ऋणीले यस्तो कर्जा लिएका छन्। लक्ष्मी सनराइज बैंकबाट ४ हजार ३९७ जना, नेपाल बैंकबाट ४ हजार २३१ जना र नेपाल इन्भेस्टमेन्ट मेगा बैंकबाट ३ हजार ७७४ जना ऋणीले सहुलियतपूर्ण कर्जा उपयोग गरेको राष्ट्र बैंकले जनाएको छ।
ग्लोबल आईएमई बैंकबाट २ हजार १३३ जना, एनएमबी बैंकबाट १ हजार ४८३ जना र कुमारी बैंकबाट १ हजार १७८ जना ऋणीले यस्तो कर्जा उपयोग गरेका छन्।
त्यस्तै, हिमालयन बैंकबाट १ हजार १३० जना, प्रभु बैंकबाट ९७१ जना र सिद्धार्थ बैंकबाट ८९० जना ऋणीले सहुलियतपूर्ण कर्जा उपयोग गरेका छन्।
विकास बैंकतर्फ ज्योति विकास बैंकबाट १ हजार ३३९ जना, मुक्तिनाथ विकास बैंकबाट १ हजार ४४० जना र गरिमा विकास बैंकबाट ५०० जना ऋणीले सहुलियतपूर्ण कर्जा उपयोग गरेको राष्ट्र बैंकको तथ्यांकमा उल्लेख छ।
सहुलियतपूर्ण कर्जा कार्यक्रमअन्तर्गत वित्तीय कम्पनीहरूबाट समेत कर्जा प्रवाह भएको राष्ट्र बैंकले जनाएको छ। पोखरा फाइनान्स, बेस्ट फाइनान्स, प्रोग्रेसिभ फाइनान्सलगायतका कम्पनीबाट पनि यस्तो कर्जा प्रवाह भएको छ।
सहुलियतपूर्ण कर्जा कार्यक्रम सरकारले लक्षित वर्ग तथा क्षेत्रमा कर्जाको पहुँच विस्तार गर्ने उद्देश्यले सञ्चालन गर्दै आएको हो। राष्ट्र बैंकको तथ्यांकले कार्यक्रममा सहभागी ऋणीको संख्या तथा स्वीकृत कर्जाको आकार उल्लेख्य रहेको देखाएको छ।
