२०८३ भाद्र २२, सोमबार १४:५६
एजेन्सी । विभिन्न देशका अन्तर्राष्ट्रिय पत्रकारहरूले दक्षिणपश्चिम चीनको सिजाङ स्वायत्त क्षेत्रमा पर्ने चिलुङ बन्दरगाहको बाढी प्रभावित क्षेत्रको भ्रमण गरेका छन्।
नेपालको उच्च हिमाली क्षेत्रमा हिमनदी भत्किएपछि आएको बाढी तथा पहिरोका कारण अगस्ट २६ मा चिलुङ बन्दरगाह प्रभावित भएको थियो। घटनापछि जारी उद्धार, राहत तथा पुनःस्थापना र पुनर्निर्माणको अवस्थाबारे जानकारी लिन पत्रकारहरू प्रभावित क्षेत्रमा पुगेका हुन्।
शनिबारसम्म उक्त विपद्मा ४३ जनाको मृत्यु भएको र ५१९ जना अझै बेपत्ता रहेको जनाइएको छ। अमेरिका, बेलायत, रुस, भारत, पाकिस्तान, सिंगापुर, ब्राजिललगायत देश तथा क्षेत्रका पत्रकारहरूले शनिबार र आइतबार चिलुङ बन्दरगाहका सबैभन्दा बढी प्रभावित क्षेत्रमा पुगेर विपद्को अवस्था तथा उद्धार र पुनर्निर्माणको प्रगति अवलोकन गरेका थिए।
भेनेजुएलामा आधारित टेलिसुरका पत्रकार ब्रुनो फाल्चीले चीनले उद्धार तथा राहत कार्यलाई तीव्र गतिमा अघि बढाएको भन्दै प्रशंसा गरे। उनले ११ दिनअघि आफूले ठूलो क्षति देखेको क्षेत्र छोटो समयमै सडक खुलेर मानिसको आवागमन सुरु भएको र पत्रकारहरू पुग्न सक्ने अवस्थामा आएको बताए।
अन्य विदेशी पत्रकारहरूले विपद्को ठूलो स्तर देखेर आफूहरू स्तब्ध भएको प्रतिक्रिया दिएका छन्। उनीहरूले यस्तो विपद्ले जलवायु परिवर्तनविरुद्ध विश्वव्यापी सहकार्यको आवश्यकता थप स्पष्ट पारेको बताएका छन्।
एसोसिएटेड प्रेस अफ पाकिस्तानका चीन संवाददाता मुहम्मद असगरले जलवायु परिवर्तन कुनै एक देशको मात्र समस्या नभएको भन्दै यसको सामना गर्न सबै देशको सामूहिक प्रयास आवश्यक रहेको बताए। बाढी तथा पहिरोबाट प्रभावित क्षेत्रमा उद्धार, राहत र पुनर्निर्माणका गतिविधिलाई तीव्र बनाइएको चिनियाँ पक्षले जनाएको छ।
