२०८३ भाद्र ८, सोमबार १४:५६
विराटनगर, भदौ ८ गते । कोशी प्रदेशका मुख्यमन्त्री हिक्मतकुमार कार्कीले सोमबार प्रदेशसभाबाट विश्वासको मत लिँदै हुनुहुन्छ। प्रदेशसभा सचिवालयका सचिव सुदर्शन खड्काका अनुसार मुख्यमन्त्री कार्कीले विश्वासको मत लिने कार्यसूची रहेको छ।
नेपालको संविधानबमोजिम मुख्यमन्त्री कार्कीले प्रदेशसभाबाट विश्वासको मत लिन लाग्नुभएको सचिव खड्काले जानकारी दिनुभयो। प्रदेशसभाको बैठकमा मुख्यमन्त्रीले विश्वासको मतका लागि प्रस्ताव पेस गर्ने र त्यसपछि संवैधानिक प्रक्रियाअनुसार मतदान हुनेछ।
यसअघि नेपाल कम्युनिष्ट पार्टी (एमाले) र नेपाली कम्युनिष्ट पार्टी (नेकपा) बीच भएको पछिल्लो सहमतिअनुसार कोशी प्रदेशको मन्त्रिपरिषद्मा नयाँ नियुक्ति, हेरफेर तथा कार्यविभाजन गरिएको छ। मन्त्रिपरिषद्मा भएको परिवर्तनपछि मुख्यमन्त्रीले विश्वासको मत लिन लाग्नुभएको हो।
मुख्यमन्त्री कार्कीको नेतृत्वमा २०८१ वैशाख २७ गते कोशी प्रदेश मन्त्रिपरिषद् गठन भएको थियो। पछिल्लो राजनीतिक समीकरणअनुसार प्रदेश सरकारलाई एमाले र नेकपाको समर्थन रहेको छ।
हाल कोशी प्रदेशसभामा एमालेका ४० र नेकपाका १७ सांसद रहेका छन्। विश्वासको मतका लागि मुख्यमन्त्रीले प्रदेशसभामा आफ्नो पक्षमा आवश्यक बहुमत जुटाउनुपर्नेछ।
मुख्यमन्त्री कार्कीले विश्वासको मत प्राप्त गरेमा वर्तमान सरकारलाई निरन्तरता दिन संवैधानिक आधार बलियो हुनेछ। प्रदेशसभाको मतदानबाट सरकारको आगामी राजनीतिक दिशा स्पष्ट हुने अपेक्षा गरिएको छ।
