२०८३ श्रावण ४, सोमबार १७:३२
काठमाडौं । नेपाली कांग्रेसले जननायक बीपी कोइरालाको ४४औँ स्मृति दिवस साउन ६ र ७ गते देशभर विभिन्न कार्यक्रम गरी मनाउने भएको छ।
सोमबार पार्टी केन्द्रीय कार्यालयमा आयोजित पत्रकार सम्मेलनमा उपसभापति विश्वप्रकाश शर्माले काठमाडौं उपत्यकामा पार्टीको केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा जलवायु परिवर्तनसम्बन्धी कार्यक्रम तथा नवीन अभियान घोषणा गर्दै स्मृति दिवस मनाइने जानकारी दिए।
कांग्रेसका अनुसार साउन ६ गते ‘जलवायु जनचेतना जगाउन जुटौँ’ भन्ने नारासहित ललितपुरमा ५ किलोमिटर ‘ग्रीन रन’ आयोजना गरिनेछ। बिहान ६ बजे यूएन पार्कबाट सुरु हुने प्रतियोगितामा महिला र पुरुषतर्फ छुट्टाछुट्टै प्रतिस्पर्धा हुनेछ।
यसै अवसरमा ‘मानवीय सहयोग कोष’ स्थापना गरिने कांग्रेसले जनाएको छ। ‘ग्रीन रन’मा सहभागी हुनेको सङ्ख्याअनुसार पार्टीले आफ्नै कोषबाट रकम थपेर कोष निर्माण गर्नेछ, जसको रकम विस्थापित सुकुम्बासी परिवारका ज्येष्ठ नागरिक र बालबालिकाको हितमा खर्च गरिने बताइएको छ।
प्रतियोगितामा महिला तथा पुरुष दुवैतर्फ प्रथम, द्वितीय र तृतीय हुनेलाई क्रमशः ५० हजार, २५ हजार र २० हजार रुपैयाँ नगद पुरस्कार प्रदान गरिनेछ। साथै चौथो, पाँचौँ र छैटौँ हुनेलाई पनि नगद पुरस्कारसहित ट्रफी र मेडल प्रदान गरिने कांग्रेसले जनाएको छ।
