२०८३ श्रावण ४, सोमवार १६:०२
काठमाडौं । अमेरिकामा सम्पन्न विश्वकप फुटबल प्रतियोगिताको फाइनलमा स्पेनसँग पराजित हुँदै अर्जेन्टिनाले उपाधि रक्षा गर्न नसकेपछि विश्वभरका समर्थकसँगै नेपाली कलाकारहरूले पनि आ–आफ्नो प्रतिक्रिया दिएका छन्।
फाइनलमा पराजयपछि कप्तान लियोनल मेसी भावुक बनेर मैदानमै रोएका थिए। यसले विश्वभरका फुटबल समर्थकलाई भावुक बनाएको छ। मेसीले यसपटक न विश्वकप उपाधि जित्न सके, न व्यक्तिगत रूपमा गोल्डेन बुट वा गोल्डेन बल नै हात पार्न सके।
गायिका रचना रिमालले मेसी र क्रिस्टियानो रोनाल्डो दुवैलाई सर्वकालीन महान खेलाडी भन्दै एउटै युगमा उनीहरूको खेल हेर्न पाउनु आफूहरूका लागि सौभाग्य भएको उल्लेख गरेकी छन्।
मेसीको खेल हेर्न अमेरिकासम्म पुगेका अभिनेता अनमोल केसी भने फाइनलपछि सामाजिक सञ्जालमा मौन देखिएका छन्। यसअघि अर्जेन्टिनाको जितमा सक्रिय रूपमा उत्सव मनाउने उनी हारपछि कुनै प्रतिक्रिया दिएका छैनन्।
हास्य कलाकार दीपकराज गिरीले स्पेनको खेलको प्रशंसा गर्दै अर्जेन्टिनाका इन्जो फर्नान्डेजले रेड कार्ड पाउनु हारको मुख्य कारण बनेको टिप्पणी गरेका छन्।
गायक प्रमोद खरेलले स्पेनको उत्कृष्ट डिफेन्सको प्रशंसा गरेका छन् भने प्रकाश सपुतले स्पेनलाई बधाई दिएका छन्। बद्री पंगेनीले आगामी विश्वकपमा पनि मेसी र रोनाल्डोलाई खेलिरहेको देख्न पाइयोस् भन्ने कामना गरेका छन्।
यस्तै, केदार घिमिरे, केकी अधिकारी, शिव परियार र जितु नेपाललगायत कलाकारहरूले पनि सामाजिक सञ्जालमार्फत फाइनलको नतिजाप्रति आफ्ना धारणा सार्वजनिक गरेका छन्।
