२०८३ श्रावण ४, सोमबार १४:३०
काठमाडौं । यातायात व्यवस्था विभागले डाटाबेस माइग्रेसन तथा नयाँ करको दर समायोजनको कार्य सुरु गरेसँगै यातायात कार्यालयमा सेवा अवरुद्ध बनेको छ ।
नयाँ आर्थिक वर्षको सुरुआतसँगै प्रदेश सरकारहरूले निर्धारण गरेका करका नयाँ दररेटहरूलाई प्रणालीमा प्रविष्टि र मिलान गर्नुपर्ने भएकाले यो प्राविधिक प्रक्रिया थालिएको विभागले जनाएको छ। सोमबार सूचना जारी गर्दै विभागले यो काम सम्पन्न गर्न करिब एक हप्ता लाग्ने जानकारी दिएको छ।
प्रणाली स्तरोन्नतिको काम भइरहेकाले अति आवश्यक अवस्थामा बाहेक यातायातसम्बन्धी अन्य सेवाहरू प्राप्त गर्न आगामी साउन ८ गतेपछि मात्र सम्बन्धित यातायात कार्यालयहरूमा सम्पर्क गर्न विभागले सर्वसाधारणलाई आग्रह गरेको छ।
डाटाबेस माइग्रेसन र कर समायोजनको प्रक्रियाबाट सेवाग्राहीमा पर्न जाने असुविधाप्रति विभागले क्षमासमेत मागेको छ। प्रणालीलाई थप सुदृढ बनाउन यो कदम चालिएको विभागको भनाइ छ।
‘प्रदेश सरकारवाट तोकिएका नयाँ करका दररेटहरु प्रविष्टी तथा मिलान कार्य भइरहेको व्यहोरा अनुरोध छ। उक्त कार्यहरु पूर्णरुपमा कार्यान्वयन हुन करिव एक हप्ता समय लाग्ने भएकाले अति आवश्यक काम परेको अवस्थामा बाहेक यातायातसम्बन्धी विभिन्न सेवा प्राप्तिका लागि साउन ८ गते पश्चात् मात्र सम्बन्धित कार्यालयहरुमा सम्पर्क गर्न हुन अनुरोध छ,’ विभागले जारी गरेको सूचनामा छ ।
