२०८२ चैत्र ३०, सोमबार १३:०२
बुडापेस्ट । हंगेरीमा भएको पछिल्लो आमनिर्वाचनले दीर्घकालीन राजनीतिक संरचनामा ठूलो परिवर्तन ल्याएको छ। झण्डै १६ वर्षदेखि सत्तामा रहँदै आएका प्रधानमन्त्री भिक्टर ओर्बान पराजित भएका छन् भने विपक्षी नेता पिटर माग्यारको उदय भएको छ।
निर्वाचनको प्रारम्भिक नतिजाअनुसार माग्यारको नेतृत्वमा रहेको ‘तिस्सा’ पार्टीले स्पष्ट बहुमत हासिल गरेको छ। संसद्को १९९ सिटमध्ये करिब दुई तिहाइ सिट जित्दै उनले शक्तिशाली जनादेश प्राप्त गरेका छन्। यसले नयाँ सरकारलाई आवश्यक संवैधानिक संशोधन गर्ने मार्ग समेत खोलिदिएको छ।
ओर्बान नेतृत्वको फिडेज पार्टी भने यसपटक कमजोर बन्दै सीमित सिटमा खुम्चिएको छ। विगतमा लगातार बहुमत ल्याउँदै आएको उक्त पार्टीका लागि यो परिणाम अप्रत्याशित झट्का मानिएको छ।
परिणाम सार्वजनिक भएपछि ओर्बानले हार स्वीकार गर्दै जनमतलाई सम्मान गर्ने बताएका छन्। उता माग्यारले आफ्नो जितलाई “नयाँ हंगेरीको सुरुवात” भन्दै लोकतान्त्रिक प्रणाली सुदृढ बनाउने प्रतिबद्धता व्यक्त गरेका छन्।
निर्वाचन अभियानका क्रममा भ्रष्टाचार, आर्थिक चुनौती र सार्वजनिक सेवाको कमजोर अवस्थालाई मुख्य मुद्दा बनाएका माग्यारले मतदाताबाट व्यापक समर्थन पाएका हुन्। उनले शिक्षा, स्वास्थ्य र न्याय प्रणालीमा सुधार गर्ने तथा संस्थागत पारदर्शिता बढाउने योजना अघि सारेका छन्।
यस परिवर्तनलाई युरोपेली संघसँगको सम्बन्ध सुधारतर्फको संकेतका रूपमा पनि हेरिएको छ। ओर्बानको शासनकालमा देखिएको तनावपूर्ण सम्बन्धलाई नयाँ नेतृत्वले सन्तुलनमा ल्याउने अपेक्षा गरिएको छ।
उच्च मतदान सहभागिताले जनताको परिवर्तनप्रतिको चाहना स्पष्ट पारेको विश्लेषकहरूले बताएका छन्। अब नयाँ नेतृत्वले पुरानो राजनीतिक संरचनालाई रूपान्तरण गर्दै स्थायित्व र सुशासन कायम गर्ने चुनौती सामना गर्नुपर्नेछ।
