२०८२ चैत्र २९, आईतवार १३:३९
काठमाडौं । भारतीय गायिका आशा भोसलेको निधन भएको छ। हृदयाघातका कारण ९२ वर्षको उमेरमा उनको निधन भएको हो । शनिबार अस्वस्थ भएपछि उनलाई मुम्बईको ब्रिच क्यान्डी अस्पताल भर्ना गरिएको थियो । उपचारकै क्रममा उनको निधन भएको भारतीय सञ्चारमाध्यमले जनाएका छन् ।
उनको स्वास्थ्य बिग्रँदै गएपछि डाक्टरहरूले शनिबार राति आईसीयूमा सारेका थिए। रातभरि अवस्था तनावपूर्ण रह्यो । परिवारले सोमबार उनको अन्तिम संस्कार गरिने पनि बताएको छ।
आशा भोसले भारतीय संगीत उद्योगकी एक प्रमुख व्यक्तित्व थिइन् । पार्श्व गायिकाका रूपमा उनले १२ हजारभन्दा बढी गीत गाएकी थिइन् । उनले नेपाली गीत पनि थुप्रै गाएकी छन्।
सन् १९३३ मा मंगेशकर परिवारमा जन्मिएकी आशा भोसलेले सानै उमेरमा संगीतमा आफ्नो यात्रा सुरु गरेकी थिइन्। उनले केवल नौ वर्षको उमेरमा व्यावसायिक रूपमा गाउन थालिन्। १९४३ सम्ममा उनले आफ्नो पहिलो फिल्म गीत रेकर्ड गरिसकेकी थिइन्। त्यसपछिको करियर दशकौंसम्म फैलियो र भारतीय सिनेमा संगीतलाई सधैंको लागि रूपान्तरण गर्यो। उनकी जेठी दिदी लता मंगेशकर हुन् ।
उनले सातपटक फिल्मफेयर सर्वश्रेष्ठ महिला पार्श्व गायिका पुरस्कार र दुई राष्ट्रिय चलचित्र पुरस्कार जितेकी थिइन् ।
