बुटवल । कपिलवस्तुको महाराजगञ्ज नगरपालिका–स्थित बर्गदवा क्षेत्रमा दुई समुदायबीच उत्पन्न तनावपछि जिल्ला प्रशासन कार्यालयले अनिश्चितकालीन निषेधाज्ञा जारी गरेको छ। स्थानीयस्तरमा सानो विवादबाट सुरु भएको स्थिति चाँडै झडपमा परिणत भएपछि प्रशासनले सुरक्षालाई प्राथमिकता दिँदै कडा निर्णय लिएको हो।

शुक्रबार बिहान धार्मिक गतिविधिका क्रममा उत्पन्न मतभेदले स्थिति असहज बनेको थियो। एकातर्फ हिन्दू धर्मावलम्बीहरूले रामनवमीको अवसरमा मन्दिरमा भजन–कीर्तन गरिरहेका थिए भने अर्कोतर्फ मुस्लिम समुदायले इद उल फित्र मनाउँदै मस्जिदमा नमाज अदा गरिरहेका थिए। दुवैतर्फ प्रयोग गरिएको माइकको आवाजका विषयमा विवाद बढ्दै जाँदा युवाहरूबीच भनाभन र त्यसपछि झडप भएको जनाइएको छ।

झडपका क्रममा दुवै पक्षबाट ढुंगा प्रहार भएको थियो, जसमा कम्तीमा पाँच जना सामान्य घाइते भएका छन्। घाइतेहरूको अवस्था सामान्य रहेको र स्थानीय स्वास्थ्य संस्थामा उपचार गरिएको बताइएको छ।

स्थिति थप बिग्रिन नदिन जिल्ला प्रशासन कार्यालय कपिलवस्तुले शुक्रबार दिउँसो २ बजेदेखि अर्को सूचना जारी नभएसम्मका लागि निषेधाज्ञा लागू गरेको हो। निषेधाज्ञा अनुसार प्रभावित क्षेत्रमा कुनै पनि प्रकारका सभा, जुलुस, भेला वा समूहगत गतिविधि गर्न रोक लगाइएको छ।

प्रशासनले बर्गदी पुलदेखि बहादुरगञ्ज चोकसम्म, महाराजगञ्ज बजारदेखि हर्दौनासम्मको क्षेत्रलाई निषेधाज्ञा लागू गरिएको क्षेत्रको रूपमा तोकेको छ। सुरक्षाकर्मीहरू व्यापक रूपमा परिचालन गरिएका छन् र अहिले अवस्था नियन्त्रणमा आएको जनाइएको छ।

निमित्त प्रमुख जिल्ला अधिकारी भविश्वर घिमिरेका अनुसार निषेधाज्ञा जारी भएपछि स्थिति क्रमशः सामान्य बन्दै गएको छ। उनले स्थानीय बासिन्दालाई संयमता अपनाउन र अफवाहमा विश्वास नगर्न आग्रह गरेका छन्।