२०८२ फाल्गुन १३, बुधबार १९:४२
काठमाडौं, फागुण १३। उच्च अदालत पाटनले अखिल नेपाल फुटबल संघ (एन्फा) र नौ अन्य व्यक्तिविरुद्ध दायर गरिएको रिटमा थ्रीस्टार क्लबको पक्षमा फैसला सुनाएको छ। गत असारमा एन्फाले थ्रीस्टारलाई बी डिभिजनमा घटुवा गर्ने निर्णय गरेको थियो।
लिग सकिएको करिब दुई वर्षपछि थ्रीस्टारले उच्च अदालतमा राष्ट्रिय खेलकुद परिषद्, युवा तथा खेलकुद मन्त्रालय, एन्फा, पंकज विक्रम नेम्बाङ्ग, किरण राई, दामोदर भट्टराई, एन्फा अनुशासन समिति, एन्फा पुनरावेदन समिति र एपिएफ फुटबल क्लबविरुद्ध मुद्दा दायर गरेको थियो। बुधबार न्यायाधीशद्वय श्रीधरा कुमारी पुडासैनी र कृष्ण मुरारी शिवाकोटीको संयुक्त इजलासले थ्रीस्टारको पक्षमा फैसला सुनाएको हो।
पूर्वअध्यक्ष अरुणमान जोशीले सेतोपाटीसँग कुरा गर्दै थ्रीस्टारले आफ्नो ए डिभिजनको हक खोसिएको भन्दै रिट दायर गरेको र अदालतले आफ्नो पक्षमा फैसला सुनाएको जानकारी दिए। मुद्दाको पूर्णपाठ भने आउन बाँकी छ।
यो विवाद गत असारमा सुरु भएको थियो, जब एन्फाको अपिल कमिटीले २०८० सालको सहिद स्मारक ए डिभिजन लिग अन्तिम खेलमा थ्रीस्टारले जावलाखेल युथ क्लबलाई १-० गोलले हराएको नतिजा उल्टाउने निर्णय गरेको थियो। सो जितसँगै थ्रीस्टार रेलिगेसनबाट बचेको थियो, भने सशस्त्र प्रहरी बलको एपिएफ क्लब रेलिगेसनमा परेको थियो।
तर, एपिएफले एन्फामा उजुरी गर्दै थ्रीस्टारले भिसा सकिएका विदेशी खेलाडी—पिटर र मार्टिन्स—खेलेको दाबी गरेको थियो। छानबिनका क्रममा खेलाडीहरुको भिसा सकिएको पाइएको भए पनि एन्फाले थ्रीस्टारलाई जरिवाना मात्र लगाएको थियो। पछि अपिल गर्दा एपिएफको पक्षमा निर्णय आएको थियो, जसले थ्रीस्टारलाई बी डिभिजनमा घटाएको थियो।
यो फैसलापछि थ्रीस्टारले फेरि ए डिभिजनमा आफ्नो स्थान पाउनेछ भने, जावलाखेलको नतिजा उल्टाएर एपिएफको अंक तालिका १२औं स्थानमा उक्लने व्यवस्था हुनेछ।
