२०८२ फाल्गुन ८, शुक्रबार १५:३२
काठमाडौं। इस्लाम धर्मावलम्बीहरूको प्रमुख तथा पवित्र पर्व रमजान आजदेखि सुरु भएको छ। हिजरी संवतको नवौं महिनामा पर्ने रमजानलाई मुस्लिम समुदायले आत्मशुद्धि, संयम र इबादतको महिनाका रूपमा श्रद्धापूर्वक मनाउने गर्दछन्।
रमजान महिनाभर मुस्लिम धर्मावलम्बीहरूले सूर्योदयदेखि सूर्यास्तसम्म रोजा (निराहार व्रत) बस्ने परम्परा छ। यस अवधिमा पानीसमेत नपिई दिनभर उपवास बस्ने र साँझ सूर्यास्तपछि इफ्तार गरेर रोजा खोल्ने गरिन्छ। रोजा बस्नु इस्लाम धर्मका पाँच आधारस्तम्भमध्ये एक मानिन्छ, जसले आत्मसंयम, धैर्यता र परोपकारको भावना विकास गर्ने विश्वास गरिन्छ।
यस पवित्र महिनामा मस्जिदहरूमा विशेष नमाज (तरावीह) अदा गर्ने चलन छ। मुस्लिम समुदायका पुरुष तथा महिलाहरू नियमित काम सकेर मस्जिदमा गई नमाज पढ्ने तथा कुरआन पाठ गर्ने गर्दछन्। रमजानको समयमा दान, जकात र सहयोगका कार्यक्रमलाई पनि विशेष महत्व दिइन्छ। आर्थिक रूपमा कमजोर तथा असहाय व्यक्तिलाई सहयोग गर्नु यस महिनाको महत्वपूर्ण पक्ष मानिन्छ।
नेपालका विभिन्न जिल्लामा रहेका मस्जिदहरूमा रमजानको अवसरमा धार्मिक गतिविधि बढेको छ। बिहान सबेरै सहरी (सहर) खाएर रोजा सुरु गर्ने र बेलुकी सामूहिक रूपमा इफ्तार गर्ने परम्पराले समुदायमा एकता र भाइचारा सुदृढ बनाउने विश्वास गरिएको छ।
रमजान महिनाको अन्त्यसँगै ईद–उल–फित्र पर्व मनाइन्छ, जसलाई मुस्लिम समुदायले विशेष उत्सवका रूपमा मनाउने गर्दछ। एक महिनाको रोजा, नमाज र आध्यात्मिक साधनापछि आउने ईदलाई खुशी, कृतज्ञता र सामूहिक सद्भावको प्रतीकका रूपमा लिने गरिन्छ।
