काठमाडौं । चौधरी ग्रुपले भदौ २३ र २४ मा भएको जेनजी आन्दोलनका प्रत्येक शहीद परिवारका एक सदस्यलाई रोजगारी दिने भएको छ । चौधरी ग्रुपका निर्देशक निर्वाण चौधरीले बुधबार यस्तो घोषणा गरेका हुन् ।

चौधरीले जेनजी आन्दोलनका शहीदप्रति हार्दिक श्रध्दाञ्जलि एवं परिवारजनप्रति समवेदना ब्यक्त गर्दै निजी निवास, कार्यालय, शोरूम र कारखानाहरूमा भएको ठूलो क्षति र विध्वंसले गहिरो पीडा दिएको पनि उल्लेख गरेका छन् ।

ADVERTISEMENT

‘यद्यपि यो पीडादायी घडीमा पनि हामी दृढ आत्मविश्वासका साथ पुनःनिर्माणको यात्रामा अघि बढेका छौँ। यस कठिन समयमा चौधरी ग्रुप शहीद परिवारप्रति उच्च सम्मान ब्यक्त गर्न निम्नअनुसारको प्रतिबद्धता व्यक्त गर्न चाहन्छ । जेनजी आन्दोलनका प्रत्येक शहीद परिवारका एक सदस्यलाई हामी रोजगारी प्रदान गर्नेछौँ। यो केवल हाम्रो वाचा मात्र होइन, हाम्रो गहिरो कर्तव्य र श्रद्धा हो। हामी सँगै उभिनेछौँ, पुनःनिर्माण गर्नेछौँ, आशा, सहानुभूति र सम्मानसहित यो देशको सुन्दर र उज्ज्वल भविष्य निर्माण गर्नेछौँ,’ निर्वाण चौधरीले भनेका छन् ।

ADVERTISEMENT

आन्दोलनका क्रममा सतुंगलस्थित सिजी कम्पनीमा आगजनी गरी ध्वस्त गरिएको थियो । साथै, चौधरी ग्रुपका अध्यक्ष विनोद चौधरीको निजी निवाससमेत तोडफोड, लुटपाट र आगजनी गरिएको थियो ।

जेनजी आन्दोलनका क्रममा अहिलेसम्म ७६ जनाको मृत्यु भइसकेको छ । जसमा भाटभटेनी डिपार्टमेन्टल जलाउन गएका १४ जनाको शव भवनभित्रै फेला परेको थियो । तीनजना प्रहरी मारिएका थिए । पाँचजना कैदीबन्दीको मृत्यु भएको थियो । त्यसैले ककसलाई शहीद मान्ने भन्ने अहिलेसम्म सरकारलाई जानकारी दिएको छैन ।