२०८२ भाद्र २, सोमवार ११:४७
काठमाडौं । अस्ट्रेलिया भ्रमणमा रहेको नेपाली राष्ट्रिय क्रिकेट टोलीका ब्याटर चल्न नसक्दा लगातार तेस्रो खेलमा पराजित भएको छ । सोमबार अस्ट्रेलियाको नर्दन टेरिटोरीमा जारी टप इन्ड टी–२० क्रिकेट सिरिजको तेस्रो खेलमा नेपाल पमेलबर्न स्टार्ससँग ३१ रनले पराजित भएको हो ।
१७६ रनको लक्ष्य पछ्याउने क्रममा नेपाल निर्धारित ओभरमा सात विकेट गुमाउँदै १४४ रनमै समेटियो । नेपालका लागि ओपनर आशिफ शेखले ४९ बलमा ५३ रनको अर्धशतकीय इनिङ्स खेले ।
कप्तान रोहितकुमार पौडेलले ३१ बलमा ३३ रन जोड्दा ओपनर कुशल भुर्तेलले २५ रन बनाए । मेलबर्नका लागि अस्टिन अन्लेजार्क र ड्युग वारेनले २÷२ विकेट लिँदा आर्यन शर्माले एक विकेट लिए । त्यसअघि टस जितेर पहिले ब्याटिङ गरेको मेलबर्नले निर्धारित ओभरमा ७ विकेट गुमाउँदै १ सय ७५ रन जोडेको थियो । समूह चरणका ६ खेलमध्ये नेपालले लगातार तीन खेल हारेको हो ।
पहिलो खेल नर्दन टेरिटोरी स्टाइकर्ससँग ४२ रनले पराजित भएको नेपाल दोस्रो खेलमा बंगलादेश ‘ए’ सँग ३२ रनले पराजित भएको थियो । नेपालले अब पर्सि बुधबार मेलवर्न रेनेगेड्स एकेडमी र शुक्रबार पाकिस्तान शाहिन्सासँग खेल्ने तालिका छ ।नेपाली टोली आईसीसी टी–२० विश्वकप छनोटको तयारीका लागि अस्ट्रेलिया गएको हो ।
