२०८२ भाद्र १२, बिहिवार २०:५३
काठमाडौँ । नेपालको अग्रणी पेमेन्ट सिस्टम अपरेटर फोनेपेले अलिपे प्लस सँग ऐतिहासिक साझेदारी गर्दै आफ्नो इन्टरअप्रेबल क्यूआर नेटवर्कमार्फत अन्तरदेशीय भुक्तानी स्वीकृत गर्न सक्षम भएको छ ।यसले नेपालको डिजिटल रूपान्तरण र अन्तरदेशीय व्यापार–व्यवसायतर्फको यात्रामा नयाँ अध्याय थपेको छ । यस साझेदारीको शुभारम्भ काठमाडौंमा आयोजित औपचारिक कार्यक्रममार्फत गरियो, जहाँ नेपाल राष्ट्र बैंक, अलिपे प्लस प्रतिनिधि, नेपाल पर्यटन बोर्ड, बैंक तथा वित्तीय संस्थानका प्रतिनिधिहरू, टुर अपरेटर तथा गाइडहरू, प्रमुख सञ्चारगृह तथा व्यावसायिक समुदायका व्यक्तित्वहरू उपस्थित थिए।
यस एकीकरणपछि चीन, दक्षिण कोरिया, मलेसिया, सिंगापुर, फिलिपिन्स, थाइल्यान्ड, जर्मनी, इटाली लगायतका ११ भन्दा बढी देशका अन्तर्राष्ट्रिय पर्यटकहरूले आफ्नो परिचित होम ई–वालेट प्रयोग गरी नेपालमा सजिलै क्यूआरमार्फत भुक्तानी गर्न सक्नेछन् ।
अब यी भुक्तानी सुविधा नेपालभरका १७ लाखभन्दा बढी फोनेपे क्यूआर–सक्षम व्यवसायीमा उपलब्ध हुनेछ, जसले पर्यटकहरूलाई नगद बोकेर हिँड्नुपर्ने वा मनी एक्सचेन्ज खोज्नुपर्ने झन्झटबाट मुक्त गर्दै सहज, सुरक्षित र सुविधाजनक अनुभव दिनेछ।
कार्यक्रममा अतिथि र प्रतिनिधिहरूलाई स्वागत गर्दै एन्ट इन्टरनेशनलका दक्षिण–पूर्वी एशिया, दक्षिण एशिया र एएनजेड क्षेत्रका जनरल म्यानेजर एडवर्ड युए ले भने “नेपालको डिजिटल भुक्तानी र पर्यटन प्रवर्धनमा योगदान गर्न पाएको यो ऐतिहासिक क्षणलाई हामी गर्वका साथ मनाउँदैछौं।”
अलिपे प्लसले नेपालको बढ्दो डिजिटल पूर्वाधारलाई थप सुदृढ बनाउँदै, भुक्तानी प्रणालीलाई आर्थिक अवसर, सांस्कृतिक सम्बन्ध र पर्यटन समृद्धिको माध्यम बनाउन सक्छ, जसले स्थानीय व्यवसायी र अन्तर्राष्ट्रिय उपभोक्ता दुवैलाई फाइदा पुर्याउनेछ।
फोनेपेका प्रमुख कार्यकारी अधिकृत दिवस कुमार सापकोटाले भने “अलिपे प्लस र फोनेपे नेटवर्कको एकीकरणले विश्वव्यापी इन्टरअप्रेबिलिटी र वित्तीय समावेशीतातर्फ ठूलो कदम चालेको छ। यस साझेदारीले नेपाल भ्रमण गर्ने अन्तर्राष्ट्रिय यात्रुहरूलाई सजिलो बनाउने मात्र होइन, हाम्रो व्यवसायीलाई थप उपभोक्तासम्म पहुँच दिलाउनेछ ।”
फोनेपे र अलिपे प्लस बीचको यो सहकार्य केवल वित्तीय कारोबारमै सीमित छैन, यसले नेपाल र एशिया–प्रशान्त क्षेत्रबीचको सांस्कृतिक र आर्थिक सम्बन्धलाई अझ मजबुत बनाउँछ। बढ्दो पर्यटन र व्यापारसँगै, नेपालमा अलिपे प्लस भुक्तानीको उपलब्धता यात्रु अनुभवलाई सहज बनाउन, व्यवसायी आम्दानी बढाउन र अन्तरदेशीय सम्पर्कलाई सबल बनाउन सहयोग पुर्याउनेछ।
यो पहलले नेपाललाई सुरक्षित अन्तरदेशीय भुक्तानीमा सक्षम बनाउँदै पर्यटन प्रवर्धनमा मद्दत गर्नेछ, साना तथा मझौला व्यवसायहरूलाई सहयोग गर्नेछ, विदेशी आम्दानी वृद्धि गर्नेछ र समग्र अर्थतन्त्रलाई सबल बनाउनेछ।
यात्रा, व्यापार र सांस्कृतिक आदान–प्रदानको केन्द्रका रूपमा नेपाललाई स्थापित गर्ने यो कदम डिजिटल भुक्तानीमार्फत लचिलोपन र आधुनिकीकरणतर्फ अग्रसर हुनेछ।
