२०८३ आश्विन १६, शुक्रबार १६:५२
काठमाडौं, असोज १६ । गत साताको तुलनामा कारोबार रकम उल्लेख्य बढेपनि यो साता शेयर बजारमा सुधार देखिएन । पाँचै दिन कारोबार भएको बजारमा एक दिन मात्रै सामान्य वृद्धि हुँदा बाँकी चार दिन नेप्से ओरालो लागेको हो ।
साताभरमा नेप्से परिसूचक २६ दशमलव ०८ अंकले घटेर शुक्रबार २ हजार ५८७ दशमलव २५ विन्दुमा सीमित भएको छ । साताको पहिलो कारोबार दिन सोमबार नेप्से २ हजार ६१३ दशमलव ३३ विन्दुमा थियो ।
क वर्गका कम्पनीको कारोबार मापन गर्ने सेन्सिटिभ इन्डेक्स पनि साताको सुरुवाती ४६७ दशमलव ६७ विन्दुबाट घटेर शुक्रबार ४६३ दशमलव ०२ विन्दुमा झरेको छ ।
पाँच दिनको बजार
सोमबार नेप्से १६ दशमलव ४७ अंक घटेर २ हजार ६१३ दशमलव ३३ विन्दुमा झरेको थियो । मंगलबार थप ९ दशमलव ६२ अंक घटेर २ हजार ६०३ दशमलव ७१ विन्दुमा सीमित भयो ।
बुधबार पनि बजारको ओरालो यात्रा रोकिएन । उक्त दिन नेप्से ४ दशमलव ८२ अंक घटेर २ हजार ५९८ दशमलव ०८ विन्दुमा पुग्यो ।
लगातार तीन दिन घटेको बजारमा बिहीबार भने सामान्य सुधार देखियो । नेप्से ० दशमलव २६ अंकले बढेर २ हजार ५९९ दशमलव १५ विन्दुमा पुगे पनि शुक्रबार पुनः ११ दशमलव ९० अंकले घटेर २ हजार ५८७ दशमलव २५ विन्दुमा झर्यो ।
कारोबार रकम भने बढ्यो
नेप्सेमा दबाब कायम रहे पनि साताको कुल कारोबार रकम भने बढेको छ । यो साता ३५७ कम्पनीका ६ करोड ८ लाख ८० हजार ६८३ कित्ता शेयर २ लाख ६३ हजार १०४ पटकको कारोबारबाट किनबेच भएका छन् ।
साताभर कुल २३ अर्ब ९९ करोड १४ लाख ४१ हजार ८५१ रुपैयाँ बराबरको कारोबार भएको छ । यो रकम अघिल्लो साताको तुलनामा करिब ५ अर्ब १४ करोड रुपैयाँ बढी हो ।
गत साता ३५६ कम्पनीको १ लाख ८० हजार ३५४ पटकको कारोबारमा ६ करोड ४ लाख ८२ हजार ९३८ कित्ता शेयर किनबेच हुँदा १८ अर्ब ८५ करोड ४३ लाख २३ हजार १८८ रुपैयाँको कारोबार भएको थियो ।
यस आधारमा साप्ताहिक कारोबार रकम करिब २७ प्रतिशत र कारोबार संख्या करिब ४६ प्रतिशतले बढेको छ । कारोबार भएको शेयर कित्तामा भने सामान्य वृद्धि देखिएको छ ।
कुन कम्पनीमा बढी कारोबार?
कारोबार रकमका आधारमा यो साता हिमालयन डिस्टिलरी, रिलायन्स स्पिनिङ मिल्स र शिवम् सिमेन्ट अगाडि देखिएका छन् ।
त्यस्तै, बजार पुँजीकरणका आधारमा नेपाल टेलिकम, नबिल बैंक र नेपाल लाइफ इन्स्योरेन्स अगाडि रहेका छन् ।
दैनिक कारोबार तालिका
| दिन | कम्पनी संख्या | कारोबार संख्या | कारोबार कित्ता | कारोबार रकम |
|---|---|---|---|---|
| सोमबार | ३५७ | ५८,५०० | १,३१,७८,१२८ | रु. ५ अर्ब ३८ करोड ५७ लाख |
| मंगलबार | ३६३ | ५१,२७४ | १,१०,६९,०७४ | रु. ४ अर्ब ६५ करोड ४८ लाख |
| बुधबार | ३५२ | ४७,९०० | १,२६,५५,३७४ | रु. ४ अर्ब ७६ करोड ५१ लाख |
| बिहीबार | ३५३ | ५१,७४५ | १,२०,६५,५५५ | रु. ४ अर्ब ८९ करोड १८ लाख |
| शुक्रबार | ३५६ | ५३,६८५ | १,१९,१२,५५० | रु. ४ अर्ब २९ करोड ३७ लाख |
| कुल | ३५७ | २,६३,१०४ | ६,०८,८०,६८३ | रु. २३ अर्ब ९९ करोड |
