२०८३ भाद्र २६, शुक्रवार १३:४२
काठमाडौं । विद्युतीय सवारीसाधनको मर्मत खर्च घटाउने उद्देश्यले जर्मन अटो पार्ट्स निर्माता जेडएफले ईभीको ड्राइभ युनिटका साना पार्ट्स छुट्टाछुट्टै मर्मत तथा प्रतिस्थापन गर्न सकिने ‘रिपेयर किट’ सार्वजनिक गरेको छ।
कम्पनीका अनुसार सामान्य खराबी आउँदा पूरै ड्राइभ युनिट फेर्नुपर्ने अवस्थालाई कम गर्दै आवश्यक पार्ट्स मात्रै मर्मत वा प्रतिस्थापन गर्न सकिने व्यवस्था गर्न खोजिएको हो।
प्रारम्भिक चरणमा १०० भन्दा बढी प्रकारका विद्युतीय एक्सलका लागि रिपेयर किट बजारमा ल्याउने जेडएफको योजना छ। कम्पनीले यसलाई ‘मर्मत–रिपेयर–पुनःप्रयोग’ रणनीतिको हिस्सा भनेको छ।
ईभीको ड्राइभ युनिटमा बियरिङजस्ता कम्पोनेन्ट बिग्रिँदा घुम्ने गति र पाङ्ग्रामा आवश्यक टर्क पठाउने प्रणाली प्रभावित हुन सक्छ। कमजोर लुब्रिकेसन, धुलो तथा अन्य प्रदूषणका कारण बियरिङ समयअगावै घिस्रिन वा बिग्रिन सक्ने कम्पनीको भनाइ छ।
कतिपय अवस्थामा सानो पार्ट्सको खराबीका कारण पूरै ड्राइभ युनिट परिवर्तन गर्नुपर्ने अवस्था आउँदा ग्राहकको मर्मत खर्च बढ्ने गर्छ। जेडएफको नयाँ रिपेयर किटले त्यस्तो खर्च घटाउने लक्ष्य राखेको छ।
कम्पनीले किटमा आवश्यक बियरिङ तथा ड्राइभ युनिटमा प्रयोग हुने अन्य कम्पोनेन्ट उपलब्ध गराउने जनाएको छ। यसबाट बिग्रिएको पार्ट्स मात्रै फेरेर ड्राइभ युनिट पुनः सञ्चालन गर्न सकिने अपेक्षा गरिएको छ।
जेडएफका अनुसार उसले हालसम्म कार निर्माता कम्पनीका लागि ६० लाखभन्दा बढी विद्युतीय मोटर उत्पादन गरिसकेको छ। यी मोटर पूर्ण विद्युतीय तथा हाइब्रिड दुवै प्रकारका सवारीसाधनमा प्रयोग हुँदै आएका छन्।
कम्पनीले युरोपमा बिक्री हुने आफ्ना २० वटा ईभीमध्ये करिब ९२ प्रतिशत मोडललाई समेट्ने गरी ईभी पार्ट्सको पोर्टफोलियो विस्तार गरिरहेको जनाएको छ। यसमा ब्रेक, स्टेरिङ, सस्पेन्सन तथा ड्राइभट्रेनका पार्ट्ससमेत समावेश छन्।
यद्यपि, नयाँ रिपेयर किट कुन–कुन ईभी मोडलमा उपलब्ध हुनेछ, यसको मूल्य कति पर्नेछ र मर्मतका लागि कति श्रम लागत लाग्नेछ भन्ने विवरण जेडएफले सार्वजनिक गरेको छैन।
ईभीको संख्या बढ्दै जाँदा महँगो ड्राइभ युनिटलाई सानो खराबीमै पूरै परिवर्तन गर्नुपर्ने अभ्यास घटाउन सके मर्मत खर्चसँगै पार्ट्सको पुनःप्रयोग र पुनर्चक्रणलाई समेत प्रोत्साहन मिल्ने अपेक्षा गरिएको छ।
जेडएफले नयाँ रिपेयर किटलाई ईभीको दीर्घकालीन मर्मत लागत घटाउने दिशामा महत्वपूर्ण कदमका रूपमा अघि सारेको छ।
