२०८२ मंसिर २२, सोमबार १७:०९
काठमाडौं । नागरिक बचाउ महाभियानका संयोजक दुर्गा प्रसाई सिंहदरबार पुगेका छन् । प्रधानमन्त्री सुशीला कार्कीलाई भेट्न उनी डेढ दर्जन युवाको जम्बो टोलीसहित प्रधानमन्त्री कार्यालय पुगेका हुन् ।
प्रधानमन्त्री कार्की र प्रसाईंको औपचारिक भेटवार्ता सुरु भएको छ । प्रसाईंले सरकारसँग राखेका २७ बुँदे मागका मुख्य बुँदाहरूबारे प्रधानमन्त्री कार्कीसँग विस्तृत छलफल चलिरहेको हो ।
वार्तामा प्रधानमन्त्री कार्कीसहित गृहमन्त्री ओमप्रकाश अर्याल पनि सहभागी छन् । प्रसाईंको तर्फबाट १९ जना वार्तामा सहभागी छन् । प्रधानमन्त्री कार्कीको निर्देशनमा समसामयिक राजनीतिक तथा सामाजिक मुद्दाहरूमा छलफलका लागि प्रसाईंलाई मंसिर २२ गतेको समय दिइएको थियो । यो भेटमा प्रसाईंले आफ्नो समूहले गत मंसिर ६ देखि राख्दै आएका मागहरूको पूर्ण कार्यान्वयनका लागि सरकारको तत्कालीन प्रतिवद्धता कार्यान्वयन नभएको भन्दै असन्तुष्टि व्यक्त गरेका छन् ।
प्रधानमन्त्रीको छलफलमा वर्तमान शान्ति–सुरक्षा अवस्था, राष्ट्रियता तथा धार्मिक स्वतन्त्रताका मुद्दाहरूमा विशेष जोड दिइएको जनाइएको छ । प्रसाईंको समूहले प्रश्तुत गरेको २७ बुँदे मागपत्रमा नेपालको वर्तमान संविधानलाई पूर्णरुपमा खारेज गरी नयाँ संविधान निर्माण गर्ने, राष्ट्रपतिको सट्टा प्रत्यक्ष निर्वाचित कार्यकारी प्रमुख प्रणाली लागू गर्ने, राजसंस्था, हिन्दु राज्य लगायतका मागहरू समावेश छन् ।
