२०८३ कार्तिक १३, शुक्रवार ११:५९
काठमाडौं । विश्वकै ठूलो क्रिप्टोकरेन्सी कारोबार प्लेटफर्म बिनान्सले आफू इतिहासकै ठूलो साइबर आक्रमणको सिकार भएको जनाएको छ। कम्पनीका अनुसार बिहीबार भएको आक्रमणबाट करिब ६.३ अर्ब अमेरिकी डलर बराबरको डिजिटल सम्पत्ति प्रभावित भएको छ।
बिनान्सले अन्य क्रिप्टो प्लेटफर्महरूको सहयोगमा चोरी भएको सम्पत्तिमध्ये करिब आधा रकम रोक्का गरिसकेको जनाएको छ। साथै, आक्रमणका कारण ग्राहकलाई हुने सम्पूर्ण आर्थिक क्षति कम्पनी आफैँले बेहोर्ने स्पष्ट पारेको छ।
प्रारम्भिक अनुसन्धानअनुसार कम्पनीकै एक इन्जिनियरको ल्यापटप ह्याक गरी आक्रमणकारीले अनधिकृत रूपमा डिजिटल सम्पत्ति निकालेको देखिएको छ।
दुई क्रिप्टो विश्लेषण संस्थाले यस आक्रमणमा उत्तर कोरियाली ह्याकिङ समूह ‘ट्रेडरट्रेटर’ को संलग्नता रहेको दाबी गरेका छन्। यही समूहले सन् २०२५ मा ‘बाइबिट’ एक्सचेन्जबाट १.५ अर्ब डलर चोरी गरेको आरोप लागेको थियो।
आर्टिफिसियल इन्टेलिजेन्समा आधारित ब्लकचेन अनुसन्धान कम्पनी टीआरएम ल्याब्सले बिनान्समाथिको आक्रमणका धेरै पक्ष यसअघिको बाइबिट ह्याकलगायत उत्तर कोरियासँग सम्बन्धित अन्य घटनासँग मिल्दोजुल्दो रहेको जनाएको छ।
टीआरएम ल्याब्सका विश्वव्यापी नीति प्रमुख एरी रेडबोर्डले यो घटना समग्र क्रिप्टो उद्योगका लागि अभूतपूर्व धक्का भएको टिप्पणी गरेका छन्। उनका अनुसार आक्रमणकारीसँग अझै ठूलो परिमाणमा चोरी भएको सम्पत्ति रहेकाले त्यसको पहिचान र फिर्ता ल्याउने काम चुनौतीपूर्ण छ।
त्यस्तै, अर्को क्रिप्टो विश्लेषण कम्पनी चेनालिसिसले पनि आक्रमणमा उत्तर कोरियाली समूहको संलग्नता रहेकोमा आफूहरू विश्वस्त रहेको जनाएको छ। कम्पनीका अनुसन्धान प्रमुख एरिक जार्डिनले क्रिप्टो प्लेटफर्ममा ठूलो धनराशि हुने भएकाले ह्याकरहरूको प्रमुख निशानामा पर्ने गरेको भन्दै सबै एक्सचेन्जलाई उच्च सतर्कता अपनाउन आग्रह गरेका छन्।
यस घटनामा उत्तर कोरियाको सम्भावित संलग्नताबारे बीबीसीले सोधेको प्रश्नमा बिनान्सले प्रत्यक्ष जवाफ दिएको छैन। तर कम्पनीले अपराधीको पहिचान पुष्टि गर्न र उनीहरूलाई कानुनी कठघरामा ल्याउन कानुन कार्यान्वयन गर्ने निकायसँग नजिकबाट काम गरिरहेको जनाएको छ।
बिनान्सका अनुसार यो घटना मुख्य प्लेटफर्म ‘बिनान्स डटकम’सँग सम्बन्धित हो। अमेरिकी नागरिकलाई लक्षित गरी सञ्चालन गरिएको तुलनात्मक रूपमा सानो प्लेटफर्म ‘बिनान्स डट युएस’ भने प्रभावित भएको छैन।
घटनापछि बिनान्सकी सह-प्रमुख कार्यकारी ही यीले चोरी भएको सम्पत्ति रोक्का गर्न सहयोग गर्ने विभिन्न क्रिप्टो कम्पनीलाई धन्यवाद दिएकी छन्। उनले प्रणाली पूर्ण रूपमा सुरक्षित भएको पुष्टि नभएसम्म रकम झिक्ने सुविधा अस्थायी रूपमा बन्द गरिएको बताएकी छन्।
यसैबीच, क्रिप्टो कम्पनी टिथर र सर्कलले घटनासँग सम्बन्धित कुल २.४ अर्ब डलर बराबरको डिजिटल सम्पत्ति रोक्का गरेको जानकारी दिएका छन्।
सर्कलका प्रमुख कार्यकारी जेरेमी अलायरका अनुसार कम्पनीले ८० करोड डलरभन्दा बढी मूल्यको यूएसडीसी रोक्का गरेको छ। त्यस्तै, टिथरका प्रमुख कार्यकारी पाओलो अर्डोइनोले यूएसडीटीको करिब १.६ अर्ब डलर बराबरको रकम रोक्का गरिएको बताएका छन्।
अमेरिकी राष्ट्रपति डोनाल्ड ट्रम्प र उनको परिवारसँग आबद्ध क्रिप्टो कम्पनी ‘वर्ल्ड लिबर्टी फाइनान्सियल’ले पनि चोरी भएको रकम रोक्का गर्न साझेदारहरूसँग मिलेर काम गरिरहेको जनाएको छ। अर्को प्रमुख क्रिप्टो एक्सचेन्ज क्वाइनबेसले भने आफू यस घटनाबाट सुरक्षित रहेको र अवस्थालाई नजिकबाट नियालिरहेको बताएको छ।
सन् २०१७ मा चीनमा स्थापना भएको बिनान्समा हाल विश्वभर ३० करोडभन्दा बढी दर्ता भएका प्रयोगकर्ता रहेको कम्पनीको दाबी छ। विभिन्न देशका नियामक निकायको निगरानीमा रहेको यस कम्पनीले सन् २०२४ मा आफूसँग १६० अर्ब डलरभन्दा बढीको डिजिटल सम्पत्ति सुरक्षित राख्ने जिम्मेवारी रहेको जनाएको थियो।
ह्याकिङको खबर सार्वजनिक भएपछि बिटक्वाइनको मूल्य चार प्रतिशतभन्दा बढीले घटेको छ। इथेरियम, सोलानालगायत अन्य प्रमुख क्रिप्टोकरेन्सीको मूल्यमा पनि गिरावट आएको समाचारमा उल्लेख छ।
