२०८३ कार्तिक ६, बिहीबार ११:०३
काठमाडौं । नेपालका विभिन्न सरकारी वेबसाइट अस्थायी रूपमा बन्द भएका छन्। राष्ट्रपति कार्यालय, प्रधानमन्त्री तथा मन्त्रिपरिषद्को कार्यालय, विभिन्न मन्त्रालय, मौसमसम्बन्धी निकाय र स्थानीय तहका वेबसाइटसमेत नखुलेका हुन्।
इन्टरनेटमा वेबसाइट सञ्चालन गर्न व्यापक रूपमा प्रयोग हुने प्रोग्रामिङ भाषा पीएचपी (PHP) मा दुईवटा गम्भीर साइबर सुरक्षा कमजोरी फेला परेपछि सरकारी वेबसाइट प्रभावित भएको बताइएको छ।
साइबर सुरक्षा निकायले सम्बन्धित सरकारी तथा अन्य संस्थालाई पीएचपीको सुरक्षा अपडेट तत्काल लागू गर्न आग्रह गरेका छन्। समयमै सुरक्षा अपडेट गर्न नसक्ने संस्थालाई सम्भावित साइबर आक्रमणबाट जोगिन वेबसाइट अस्थायी रूपमा बन्द राख्न सुझाव दिइएको छ।
यसअघि पनि उक्त कमजोरी समाधान गर्न सुरक्षा अपडेट जारी गरिएको थियो। तर, आवश्यक अपडेट समयमै लागू गर्न नसकेका वेबसाइट सञ्चालकलाई सुरक्षा जोखिम कम नभएसम्म वेबसाइट बन्द राख्न भनिएको हो।
साइबर सुरक्षा कम्पनी विज (Wiz) ले यी कमजोरीलाई कृत्रिम बुद्धिमत्ता (एआई) प्रविधिको सहयोगमा पत्ता लागेका गम्भीर सुरक्षा कमजोरीमध्येका रूपमा उल्लेख गरेको छ।
सुरक्षा जोखिमका कारण वेबसाइट बन्द गरिएका भए पनि सबै सरकारी वेबसाइट एउटै कारणले बन्द भएका हुन् वा होइनन् भन्ने विषयमा आधिकारिक पुष्टि आवश्यक छ। साथै, वेबसाइटहरू कहिलेदेखि पुनः सञ्चालनमा आउनेछन् भन्नेबारे पनि स्पष्ट जानकारी सार्वजनिक भएको छैन।
