तिनाउ बाढीले छ घर बगायो, बस्ती नै जोखिममा (तस्बिर)Britant News

बुटवल । रुपन्देहीको तिनाउ नदीमा आएको बाढीले बुटवल उपमहानगरपालिका–११ स्थित टप मझुवा क्षेत्रमा ६ वटा घर बगाएको छ।

इलाका प्रहरी कार्यालय बुटवलका अनुसार शनिबार राति आएको बाढीले २ वटा पक्की र ४ वटा कच्ची घर बगाएको हो।

इलाका प्रहरी कार्यालय बुटवलका डीएसपी निशान्त श्रीवास्तवका अनुसार तिनाउ नदीमा आएको बाढीका कारण टप मझुवा क्षेत्रमा रहेका ती घर बगेका हुन्।

लगातारको वर्षाका कारण तिनाउ नदी तथा आसपासका खोलामा जलस्तर बढेपछि बुटवलका तटीय क्षेत्रमा बाढीको जोखिम बढेको थियो।

जोखिममा रहेका तटीय क्षेत्रका करिब २०० घरपरिवारलाई सुरक्षित स्थानमा सारिएको प्रहरीले जनाएको छ।