२०८३ आश्विन ४, आईतवार १२:३२
बागलुङ । कालीगण्डकी नदीमाथि बनेको ५ सय ६७ मिटर लामो ‘गण्डकी गोल्डेन ब्रिज’ पछिल्लो समय पर्यटकको आकर्षणको केन्द्र बनेको छ। ‘सिङ्गल स्पान’मा संसारकै लामो झोलुङ्गे पुल भएको दाबी गरिएको यो पुलले बागलुङ र पर्वत दुई जिल्लालाई जोडेको छ।
बागलुङ सदरमुकाम र पर्वतको पाङ गाउँ कालीगण्डकी नदीको वारिपारि छन्। नदीको गहिरो खोँचका कारण केही वर्षअघिसम्म यी दुई गन्तव्यबीचको आवतजावत सहज थिएन। पाङवासी बागलुङ बजार आउजाउ गर्न घण्टौँ पैदल यात्रा गर्नुपर्ने अवस्था थियो।
तर, झोलुङ्गे पुल सञ्चालनमा आएपछि यो दूरी पार गर्न लाग्ने समय उल्लेख्य रूपमा घटेको छ। अहिले कालीगण्डकीमाथिको पुलबाट करिब १० मिनेटमै बागलुङ र पर्वतबीच आवतजावत गर्न सकिन्छ।
२०७७ सालदेखि सञ्चालनमा आएको पुलले बागलुङ नगरपालिका–१ बाङ्गेचौर र पर्वतको कुश्मा नगरपालिका–१ पाङलाई जोडेको छ। कालीगण्डकी नदीबाट करिब १ सय २२ मिटर उचाइमा रहेको पुललाई बागलुङ नगरपालिकाले अंग्रेजीमा ‘गण्डकी गोल्डेन ब्रिज’ र नेपालीमा ‘गण्डकी सुनौलो झुला’ नाम दिएको छ।
करिब ९ करोड २५ लाख रुपैयाँको लागतमा निर्माण भएको पुलले स्थानीयको आवतजावत सहज बनाउनुका साथै बागलुङको पर्यटन गतिविधिलाई समेत नयाँ गति दिएको छ।
पुल बनेपछि बढ्यो पर्यटकको आकर्षण
पुल सञ्चालनमा आउनुअघि बागलुङ आउने धेरै पर्यटक प्रसिद्ध बागलुङ कालिका मन्दिरसम्म पुगेर फर्किने गरेको बताइन्छ। अहिले भने बागलुङ कालिका, पञ्चकोट, सुरुङभित्र रहेको शालिग्राम सङ्ग्रहालयसँगै ‘गण्डकी गोल्डेन ब्रिज’ पनि पर्यटकको रोजाइमा पर्न थालेको छ।
विशेषगरी बिदाको समयमा पुलमा पर्यटकको चहलपहल बढ्ने गरेको छ। पुलबाट कालीगण्डकी नदी, आसपासका पहाड र बस्तीको दृश्य अवलोकन गर्न सकिन्छ। पुलमा पुग्ने पर्यटक फोटो खिच्ने, भिडियो बनाउने तथा सामाजिक सञ्जालका लागि सामग्री तयार गर्ने गरेको देखिन्छ।
पुल सञ्चालनमा आएपछि बागलुङ र पर्वतबीचको आवतजावत मात्र सहज भएको छैन, यसले दुई जिल्लाबीचको पर्यटन सम्भावनालाई समेत जोडेको स्थानीयको भनाइ छ।
म्याग्दी–मुस्ताङ जाने पर्यटक पनि पुग्छन् पुलमा
पर्वतबाट बागलुङतर्फ नआई सिधै म्याग्दी र मुस्ताङ जाने मार्ग कालीगण्डकी किनारबाट समेत रहेको छ। यही बाटो हुँदै म्याग्दी तथा मुस्ताङ जाने पर्यटकले पनि ‘गण्डकी गोल्डेन ब्रिज’लाई आफ्नो यात्राको गन्तव्य बनाउन थालेका छन्।
कालीगण्डकी नदीमाथि बनेको लामो झोलुङ्गे पुल आफैँमा आकर्षण बनेपछि छोटो समयका लागि भए पनि पुलमा पुगेर दृश्यावलोकन गर्ने र तस्बिर खिच्ने पर्यटकको संख्या बढ्दै गएको छ।
‘झोलुङ्गे पुलको जिल्ला’ बागलुङ
बागलुङलाई झोलुङ्गे पुलको जिल्लाका रूपमा पनि चिनिन्छ। जिल्लाका विभिन्न स्थानमा रहेका झोलुङ्गे पुलले स्थानीय बस्तीलाई जोड्नुका साथै पछिल्लो समय पर्यटन प्रवर्द्धनमा समेत योगदान पुर्याउँदै आएका छन्।
कालीगण्डकीमाथिको ‘गण्डकी गोल्डेन ब्रिज’ भने यसको लम्बाइ, उचाइ र दुई जिल्लालाई जोड्ने विशेषताका कारण छुट्टै पहिचान बनाउन सफल भएको छ।
स्थानीयका लागि आवतजावतको साधन बनेको यो पुल अहिले पर्यटकका लागि समेत नयाँ गन्तव्य बनेको छ। कालीगण्डकीको गहिरो खोँचमाथि फैलिएको ५६७ मिटर लामो पुलले बागलुङ र पर्वतलाई मात्रै जोडेको छैन, यस क्षेत्रको पर्यटन सम्भावनालाई समेत थप उजागर गरेको छ।
