२०८३ भाद्र १५, सोमबार १७:१५
काठमाडौं । रसुवाको भोटेकोशी हुँदै त्रिशूली नदीमा आएको विनाशकारी बाढीबाट प्रभावित नागरिकका लागि राजनीतिक दलहरूले राहत तथा उद्धारमा सहयोग गर्ने क्रम तीव्र पारेका छन्। विभिन्न दलहरूले प्रधानमन्त्री राहत कोषमा नगद सहयोग गर्ने तथा राहत सामग्री प्रभावित क्षेत्रमा पठाउने घोषणा गरेका छन्।
संसद्को दोस्रो ठूलो दल नेपाली कांग्रेसले बाढीपीडितको सहयोगका लागि प्रधानमन्त्री राहत कोषमा १ करोड रुपैयाँ जम्मा गर्ने निर्णय गरेको छ। पार्टीको केन्द्रीय कार्यालयमा आइतबार बसेको बैठकले उक्त रकम सहयोग गर्ने निर्णय गरेको प्रवक्ता देवराज चालिसेले जानकारी दिए।
त्यस्तै, नेपाली कम्युनिस्ट पार्टी (नेकपा) ले रसुवा बाढीपीडितको सहयोगका लागि प्रधानमन्त्री राहत कोषमा तत्काल २५ लाख रुपैयाँ सहयोग गर्ने निर्णय गरेको छ। पार्टीले आवश्यक राहत सामग्रीसमेत प्रभावित जिल्लामा पठाउने निर्णय गरेको प्रवक्ता प्रकाश ज्वालाले बताए।
सत्तारुढ दल राष्ट्रिय स्वतन्त्र पार्टी (रास्वपा) ले खोज, उद्धार तथा राहतका लागि सरकारलाई ५० लाख रुपैयाँ आर्थिक सहयोग गर्ने निर्णय गरेको छ। बाढी आएको लगत्तै बसेको पार्टी सचिवालय बैठकले उक्त रकम सहयोग गर्ने निर्णय गरेको प्रवक्ता जगदीश खरेलले जानकारी दिए।
नेकपा एमालेले पनि बाढी प्रभावितका लागि सहयोग रकम प्रदान गर्ने तयारी गरेको जनाएको छ। सोमबार बेलुकासम्म पार्टीले कति रकम सहयोग गर्ने भन्ने निर्णय हुने एमाले प्रचार तथा प्रकाशन विभाग प्रमुख नीरज आचार्यले जानकारी दिए।
एमाले बागमती र राजधानी प्रदेश कमिटीले भने प्रधानमन्त्री राहत कोषमा २० लाख रुपैयाँ सहयोग गर्ने घोषणा गरिसकेका छन्। पार्टीका सबै तहका कमिटीबाट सहयोग संकलन गरी एकमुष्ट रूपमा पार्टीको तर्फबाट सहयोग गर्ने तयारी भइरहेको सचिव महेश बस्नेतले बताए।
त्यस्तै, श्रम संस्कृति पार्टीले बाढीपीडितका लागि तत्काल १५ लाख रुपैयाँ सहयोग गर्ने घोषणा गरेको छ। पार्टी अध्यक्ष हर्क साम्पाङले सामाजिक सञ्जालमार्फत प्रधानमन्त्री राहत कोषमा १५ लाख रुपैयाँ जम्मा गर्ने घोषणा गरेका हुन्।
उज्यालो नेपाल, राष्ट्रिय प्रजातन्त्र पार्टी (राप्रपा) तथा विभिन्न मधेस केन्द्रित दलहरूले पनि बाढीपीडितका लागि राहत रकम तथा सामग्री उपलब्ध गराउने तयारी गरिरहेको जनाएका छन्।
गत बुधबार तिब्बततर्फबाट भोटेकोशी हुँदै त्रिशूली नदीमा आएको बाढीबाट रसुवा, नुवाकोट, धादिङ, गोरखा र तनहुँ बढी प्रभावित भएका छन्। बाढीका कारण ठूलो जनधनको क्षति भएको छ भने हजारौँ नागरिक विस्थापित भएका छन्।
ह्यासट्याग:
