२०८३ भाद्र १५, सोमबार १५:३७
काठमाडौँ । साताको पहिलो कारोबार दिन सोमबार धितोपत्र बजार (नेप्से) मा दोहोरो अंकको गिरावट आएको छ। रसुवा लगायतका क्षेत्रमा आएको बाढीपहिरोबाट जनजीवन प्रभावित भइरहेका बेला त्यसको प्रत्यक्ष तथा अप्रत्यक्ष असर लगानीकर्ताको मनोबलमा समेत परेको देखिएको छ।
नेपाल स्टक एक्सचेन्ज (नेप्से) का अनुसार सोमबार नेप्से परिसूचक ४७.२९ अंक अर्थात् १.८४ प्रतिशतले घटेर २ हजार ५१०.०१ विन्दुमा झरेको छ। बजार खुलेदेखि नै ओरालो लागेको परिसूचक कारोबारको अन्तिम समयसम्म सुधार हुन सकेन।
सोमबार ९० लाख ६५ हजार कित्ता सेयर किनबेच हुँदा कुल ३ अर्ब ५३ करोड रुपैयाँ बराबरको कारोबार भएको छ।कारोबारमा सहभागी कम्पनीमध्ये १३ कम्पनीको सेयर मूल्य बढ्दा २६३ कम्पनीको मूल्य घटेको छ। दुई कम्पनीको सेयर मूल्य भने स्थिर रह्यो।
आजको कारोबारमा घोराही सिमेन्टको सेयर मूल्य ७.५७ प्रतिशतले बढेको छ। यसबाहेक अधिकांश कम्पनीमा उल्लेख्य वृद्धि देखिएन। उल्टो, ३५ कम्पनीको सेयर मूल्य ५ प्रतिशतभन्दा बढीले घटेको छ।सबैभन्दा बढी गिरावट मिक्लाजुङ, चिलिमे र रसुवागढी हाइड्रोपावर लगायतका कम्पनीमा देखिएको छ।
कारोबार रकमका आधारमा शिवम् सिमेन्ट अग्रस्थानमा रहेको छ। यसको २६ करोड ८ लाख रुपैयाँ बराबरको सेयर कारोबार भएको छ। त्यसपछि सर्वोत्तम पेन्ट्स र चिलिमे हाइड्रोपावर सर्वाधिक कारोबार हुने कम्पनीमा परेका छन्।
समूहतर्फ हेर्दा सोमबार निर्जीवन बीमा समूहमा सबैभन्दा ठूलो गिरावट आएको छ। उक्त समूहको सूचक ५.०३ प्रतिशतले घटेको छ। त्यस्तै, अन्य समूह ३.३० प्रतिशत, होटल तथा पर्यटन समूह २.९४ प्रतिशत र होटल तथा टुरिजम क्षेत्र २.४४ प्रतिशतले घटेका छन्।
पछिल्लो समय प्राकृतिक विपत्तिका कारण जलविद्युत आयोजनामा परेको क्षति तथा सडक सञ्जाल अवरुद्ध हुँदा आपूर्ति व्यवस्थामा परेको असरले लगानीकर्ताको मनोबल कमजोर बनेको बजार विश्लेषकहरूको भनाइ छ। विशेषगरी बाढीपहिरोको प्रत्यक्ष जोखिममा रहेका जलविद्युत कम्पनीका सेयरमा त्यसको नकारात्मक प्रभाव देखिएको छ।
समग्रमा, प्राकृतिक विपत्ति, पूर्वाधारमा परेको क्षति र लगानीकर्ताको बढ्दो जोखिम धारणाले सोमबारको बजारमा बिक्री चाप बढाएको देखिएको छ।
