२०८३ श्रावण १, शुक्रबार ०७:१६
काठमाडौँ । नेपाल विद्युत् प्राधिकरणले आजदेखि ५० युनिटभन्दा बढी विद्युत् खपत गर्ने घरायसी ग्राहकको विद्युत् महसुलमा ५ प्रतिशत मूल्य अभिवृद्धि कर (भ्याट) लागू गरेको छ। नयाँ व्यवस्था कार्यान्वयनका लागि प्राधिकरणले आफ्नो बिलिङ प्रणाली अद्यावधिक गरिसकेको जनाएको छ।
अर्थमन्त्री डा. स्वर्णिम वाग्लेले जेठ १५ गते संसद्मा प्रस्तुत गरेको आर्थिक वर्ष २०८३/८४ को बजेटमार्फत घरायसी विद्युत् उपभोगमा भ्याट लागू गर्ने घोषणा गरेका थिए। सोही व्यवस्थाअनुसार नयाँ आर्थिक वर्ष सुरु भएसँगै यो निर्णय कार्यान्वयनमा आएको हो।
नयाँ व्यवस्थाअनुसार पहिलो ५० युनिटसम्मको विद्युत् महसुलमा कुनै भ्याट लाग्ने छैन। तर ५० युनिटभन्दा बढी खपत गर्ने उपभोक्ताले अतिरिक्त खपतमा लाग्ने विद्युत् महसुलमा ५ प्रतिशत भ्याट तिर्नुपर्नेछ।
यसको अर्थ मासिक ५० युनिट वा सोभन्दा कम विद्युत् प्रयोग गर्ने घरायसी ग्राहक अतिरिक्त करको दायरामा पर्ने छैनन्। तर ५१ युनिट वा सोभन्दा बढी विद्युत् खपत गर्ने ग्राहकले नयाँ व्यवस्थाअनुसार ५ प्रतिशत भ्याट तिर्नुपर्नेछ।
नेपाल विद्युत् प्राधिकरणका अनुसार देशभर ५० युनिटसम्म विद्युत् खपत गर्ने घरायसी ग्राहकको संख्या ३० लाखभन्दा बढी रहेको छ। यस वर्गका उपभोक्तालाई नयाँ भ्याट व्यवस्थाले प्रत्यक्ष असर नगर्ने भए पनि ५० युनिटभन्दा बढी विद्युत् प्रयोग गर्ने ग्राहकको मासिक विद्युत् बिल भने बढ्नेछ।
