२०८३ जेष्ठ ३१, आईतवार २०:२४
काठमाडौं । फिफा विश्वकप २०२६ अन्तर्गत समूह ‘ई’ को रोमाञ्चक प्रतिस्पर्धामा उपाधि दाबेदार जर्मनीले आइतबार विश्वकपमा पहिलो पटक सहभागी भएको कुरासाओविरुद्ध खेल्दै आफ्नो अभियान सुरु गर्दैछ।
अमेरिकाको टेक्सासस्थित ह्युस्टनमा हुने खेलमा विश्व फुटबलको शक्तिशाली टोली जर्मनी र विश्वकप इतिहासकै सबैभन्दा कम जनसंख्या भएको राष्ट्र कुरासाओबीच रोचक प्रतिस्पर्धा हुने अपेक्षा गरिएको छ।
मुख्य प्रशिक्षक जुलियन नागेल्समानको नेतृत्वमा रहेको जर्मनी उत्कृष्ट लयमा रहेको छ। विश्वकपअघि खेलेका तयारी खेलहरूमा जर्मनीले फिनल्यान्ड र आयोजक अमेरिका दुवैलाई पराजित गरेको थियो। टोली गत वर्षको सेप्टेम्बरयता अपराजित रहँदै आएको छ।
सन् २०१४ को विश्वकप विजेता जर्मनी पछिल्ला दुई संस्करणमा भने समूह चरणबाटै बाहिरिएको थियो। त्यसैले यसपटक टोलीको लक्ष्य केवल नकआउट चरण पुग्ने मात्र नभई उपाधि जित्ने पनि रहेको छ।
यता विश्व वरीयताको ८२औँ स्थानमा रहेको कुरासाओ पहिलो पटक विश्वकप खेल्दै इतिहास रच्न मैदान उत्रिँदैछ। ७८ वर्षीय प्रशिक्षक डिक एड्भोकाटको नेतृत्वमा रहेको टोलीले छनोट चरणमा उत्कृष्ट प्रदर्शन गर्दै विश्वकपमा स्थान बनाएको हो।
कुरासाओले हालैको तयारी खेलमा अरुबालाई ४–० ले पराजित गरेको थियो। टोलीका ताहित चोङ, रिचेड्ली बाजोअर, लिएन्ड्रो बाकुना र युर्गेन लोकाडिया जस्ता खेलाडीहरूबाट समर्थकहरूले राम्रो प्रदर्शनको अपेक्षा गरेका छन्।
जर्मनीका लागि गोलरक्षक मानुएल नोयरको पुनरागमन विशेष चासोको विषय बनेको छ। चोटबाट फर्किएका ४० वर्षीय नोयर सुरुआती रोजाइमा पर्ने सम्भावना रहेको छ। यद्यपि उनको फिटनेसलाई लिएर केही प्रश्नहरू भने अझै कायम छन्।
कागजमा हेर्दा जर्मनी स्पष्ट रूपमा बलियो टोली देखिन्छ। अनुभव, खेलाडीको स्तर र पछिल्लो प्रदर्शनका आधारमा जर्मनीलाई सहज जितको दाबेदार मानिएको छ। तर विश्वकपमा पहिलो पटक खेल्न लागेको कुरासाओले पनि आफूलाई प्रमाणित गर्ने अवसरको रूपमा यो खेललाई लिएको छ।
यदि जर्मनीले आफ्नो स्वाभाविक खेल प्रदर्शन गर्न सक्यो भने विश्वकप २०२६ को यात्रा विजयी सुरुआतबाट गर्ने अपेक्षा गरिएको छ।
