२०८२ माघ २५, आईतवार १०:३९
काठमाडौँ। नेपाल राष्ट्र बैंकले मौद्रिक व्यवस्थापनका लागि ५१ अर्ब रुपैयाँ बराबरको निक्षेप संकलन उपकरणमार्फत बोलकबोल गर्ने भएको छ। राष्ट्र बैंकले २०८२ माघ २५ गते दिउँसो ३ बजेसम्म अनलाइन बिडिङ सिस्टम (OBSS) मार्फत बोलकबोल हुने जानकारी दिएको छ।
राष्ट्र बैंकका अनुसार निक्षेप संकलनको अवधि ४२ दिनको हुनेछ। यसका लागि न्यूनतम १० करोड रुपैयाँ र अधिकतम ५ अर्ब रुपैयाँसम्म बोल गर्न सकिने व्यवस्था गरिएको छ। बोलकबोलमा ब्याजदर प्रतिस्पर्धात्मक रूपमा निर्धारण हुनेछ भने बहुब्याजदरमा पनि बोल गर्न सकिनेछ।
निक्षेप संकलनमा नेपाल राष्ट्र बैंकबाट इजाजत प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्र सहभागिता जनाउन पाउनेछन्। स्वीकृत बोलअनुसारको रकम सम्बन्धित बैंकको राष्ट्र बैंकस्थित खाताबाट कट्टा गरी निक्षेप संकलन खातामा जम्मा गरिनेछ।
राष्ट्र बैंकले संकलित निक्षेप रकम फागुन २ गते निक्षेप खातामा राखिने र चैत १ गते सावाँ तथा ब्याज भुक्तानी गरिने जनाएको छ। संकलित निक्षेप रकम अनिवार्य नगद मौज्दात (CRR) मा गणना नहुने भए पनि वैधानिक तरलता अनुपात (SLR) र तरलता अनुपातमा भने गणना हुने स्पष्ट गरिएको छ।
