काठमाडौँ। अमेरिकी भर्चुअल दूतावासले इरानमा रहेका आफ्ना नागरिकलाई तत्काल देश छोड्न आग्रह गरेको छ। शुक्रबार बिहान जारी गरिएको सुरक्षा सूचनामा दूतावासले अमेरिकी नागरिकलाई अमेरिकी सरकारको सहयोगमा निर्भर नरहने गरी आफ्नै विकल्पमा सुरक्षित रूपमा बाहिरिने योजना बनाउन पनि सुझाव दिएको छ।

यो चेतावनी अमेरिका र इरानबीच ओमानमा हुने तय वार्ताको पूर्वसन्ध्यामा आएको हो। यद्यपि बैठकको एजेन्डाबारे दुवै पक्षबीच अझै सहमति नदेखिएकाले वार्ताबाट ठोस निष्कर्ष निस्कनेमा अनिश्चितता कायमै छ।

अमेरिकी अधिकारीहरूका अनुसार उक्त वार्तामा अमेरिकी विशेष दूत स्टिभ विटकोफ र राष्ट्रपति डोनाल्ड ट्रम्पका ज्वाइँ जेरेड कुशनर सहभागी हुनेछन्। इरानको तर्फबाट विदेशमन्त्री अब्बास अराघचीको नेतृत्वमा टोली वार्तामा सहभागी हुने बताइएको छ।

गत वर्ष जुनमा इजरायलसँग भएको १२ दिन लामो युद्धपछि अमेरिका–इरान सम्बन्ध थप तनावग्रस्त बनेको थियो। सो युद्धका क्रममा अमेरिकाले इरानका तीन प्रमुख आणविक केन्द्रमाथि हवाई आक्रमण गरेको थियो। त्यसयता तेहरान र वाशिङ्टनबीच हुने यो पहिलो औपचारिक वार्ता हो।

वार्ताको दायरा र स्थानलाई लिएर देखिएको मतभेदले बैठक सफल हुने नहुनेबारे शंका उत्पन्न गराएको छ। विश्लेषकहरूका अनुसार सहमति नजुटेमा अमेरिकी सैन्य कारबाहीको सम्भावना पनि खुला रहन सक्छ।

अमेरिकाले इरानसँग युरेनियम समृद्धिकरणका भण्डार परित्याग गर्न, ब्यालिस्टिक मिसाइल कार्यक्रम सीमित गर्न तथा मध्यपूर्वका सशस्त्र समूहलाई सहयोग बन्द गर्न माग गरेको बताइएको छ। राष्ट्रपति ट्रम्पले यी माग पूरा नभए सैन्य आक्रमणको चेतावनी दिँदै आएका छन्।

यसको जवाफमा इरानले अमेरिकी मागलाई आफ्नो सार्वभौमिकतामाथिको हस्तक्षेप भन्दै अस्वीकार गरेको छ। कुनै पनि आक्रमण भए कडा प्रतिकार गर्ने चेतावनी दिँदै इरानले क्षेत्रका अमेरिकी सैन्य अड्डा र इजरायललाई निशाना बनाउने चेतावनीसमेत दिएको छ।